Netanyahu-a'n Rafah-a beihpui thlak tum ruh

Israel Prime Minister Benjamin Netanyahu chuan pawn lam aṭangin ngenna tam tak awm mah se, an ram sipaite chuan Gaza khawpui pakhat Rafah chu an luhchhuah ngei dawn tih a sawi.

France President Emmanuel Macron chuan Netanyahu hnenah hian nunna chan tam tak an awm dawn avangin inngaihtuah ṭha leh tura a duh thu a lo sawi tawh a, Israel- in Gaza-a beihpui a thlak avanga tawrhna chu pawmzam mai a har thu a sawi. Ngenna tam tak karah Netanyahu hian Israel sipai chu lei lama hma la tura inralring turin thu a pe thung a ni.

Rafah khua hi Palestinian mi mtd. 1.4 chuangin tawmhim nan an hmang mek. Netanyahu chuan sipai chakna hmangin Rafah chu nasa taka beih a tum thu a sawi a, Gaza Strip-a rorel mek Hamas chu Gaza chhim lama an inbenbelna hmun aṭanga paih chhuah an ngaih thu a sawi. Netanyahu chuan,"Hnehna pumhlum kan chan hma chuan kan bei zel dawn a, Rafa- ah pawh civil mi chengte inthiarfihlim tura kan tih hnuah beihpui hi kan thlak leh dawn a ni" a ti.

Israel a cham mek Germany foreign minister Annalena Baerbock pawhin Rafah mipui, hmun danga kalna tur nei chuanglote chu an boral mai a hlauh thu a sawi ve bawk. European Union (EU) member pahnih Spain leh Republic of Ireland chuan EU chu Gaza-a Israel chet danah Israel Human rights thutiam a bawhchhia em tih enfiah turin an ngen ve mek bawk.

Hamas rorelna hnuaia awm, Gaza health ministry chuan hriat theih chinah Israel-in Gaza-a beihpui a thlak hnuah mi 28,576-in nunna an chan tawh a, heng zinga a tam zawk hi hmeichhia leh naupang an nih thu an sawi.