Israel beihna avangin Lebenon mi 10-in nunna an chan

Lebanon state media chuan thuchhuah siamin Israel-in boruak aṭanga Lebanon a beihna avangin Lebanese mi 10-in nunna an chan tih an sawi, thla 4 chhunga thi an tam ber ṭum a ni. Israel hian Lebanon lam beihna avanga sipai pakhat an chan hnuah boruak aṭangin Nabatiyeh leh Lebanon chhim lama khaw pakhat chu an bei ve leh a ni. Israel chetna hi Hezbollah chuan chhan let ngei an tum thu an sawi.

Israel sipai chuan Nilainia Lebanon an kah ṭum hian Hezbollah sipai ṭha bik, Radwan Force-a an senior commander Ali Dibs chu thah a nih thu an sawi a, Ali Dibs hi Israel ram vawi tam tak lo bei tawhtu a ni, an ti. Hemi bakah hian Dibs-a deputy, Hassan Ibrahim Issa leh Hezbollah helpawl ṭhenkhat chu Nabatiyeh chhim lamah an thah thu an sawi bawk. Hezbollah lam hian Israel beihna avang hian an mi leh sa pathum an chan thu an sawi a, Dibs leh Issa thlalak chu tarlangin Hezbollah nena an inkungkaih dan erawh an sawi lang lo thung.

Israel sipaite chuan Ningania boruak aṭanga an beihnaah hian Hezbollah hmunhma chu bitum a nih thu an sawi. Israel Army thupuangtu, Avi Hyman chuan Hezbollah-in an beihna chu an chhang let zel dawn tih a sawi a,"Hezbollah tana kan thuchah chu a la ngai reng : min chhin suh u" a ti.

Israel-in Gaza-a Nasser damdawi in a bei

Gaza Strip chhim lama awm Nasser damdawi in chu Israel sipaite'n an bei. He hmuna thawktu leh damlote chu an inthiarfihlimtir hnuah siapite hian damdawi in hmunhma hi an kap a ni. Nasser damdawi in hi Khan Younis-a awm niin Gaza Strip-a damdawi in hman theih tlemte zinga mi a ni.

Israel sipai thupuangtu Daniel Hagari chuan Nasser damdawi inah hian Hamas-te'n an mi hrenbeh ṭhenkhat an dah nia an hriat thu sawiin, hei hi an beihna chhan pakhat a ni, a ti. An sipaite chuan damdawi in chhungah chuan ralthuam (mortars, grenade, etc) chi hrang hrang an man thu a sawi bawk.

Gaza Health ministry chuan Nasser damdawi in leh chhehvel chu Israel sipaite'n an lak tawh thu an sawi lang ve bawk a, khawvel ramdangte chu a tlai hmaa Nasser damdawi ina thawktu leh damlote himna atan hma la thuai turin an ngen. Hamas chuan Nasser damdawi in beih a ni hi an dem takzet a, pawikhawihna lian tak a nih thu an sawi. An mi leh sate chu Nasser damdawi inah hian an awm loh thu leh, damdawi in chhung chu Hamas-te'n Israel beih nan an hman ṭangkai ngai loh thu an sawi ve thung.

Hamas-in Israel rawtna hnawl

Hamas-te chuan an mi hren mekte chhuahna tura Israel sorkar rawtna siam chu an hnawl.

Israel hian Hamas-te'n Gaza Strip-a an mi hren mekte an chhuah vek chuan, Israel ram jail hrang hranga Palestinian tang zinga 1,500 a chhuah tur thu a sawi a, mahse, hei hi Hamas lam hian an pawm lo.

US Secretary of State Antony Blinken chuan Hamas mi hren mekte chhuahna tur hi inremna siam theih loh chu ni lo mah se, thil chinfel harsa tak tur a nih thu a sawi. Hamas lamin Israel rawtna an hnawl tak avangin, Muslim thla serh,March 10 aṭang inṭan tur Ramadan thla a thlen hmaa inremna a awm theihna atan Qatar leh Egypt palaite nen hma an la mek tih a sawi zui bawk. Thil harsa tak tak chinfel tur awm mah se, theihtawp chhuahin inremna a awm theih ngei erawh an beisei thu a sawi.

Munich Security Conference-ah Israel President

Israel President, Isaac Herzog chu Munich Security Conference-a tel turin nimin khan Germany-ah a zin.

MSC hi kum 1963, Cold War vanglai aṭang khan neih ṭan a ni. Tun ṭumah hian internatioanl security policy chungchangte an sawiho bakah, Russia-Ukraine leh Israel-Hamas buaina thleng mek chu an khelho dawn a ni. Khawvel ram hrang hruaitu, international leh non-governmental organisation, business, media, academia, civil society hruaitu mi 450 chuang an kal khawm. US vice president Kamala Harris, Ukraine president Volodymyr Zelenskyy, Israel president Isaac Herzog leh Palestinian prime minister Moahmmad Shtqayyeh-te pawh an tel. Nimin khan Conference hi ṭanin, Pathianni thleng a awh ang.

Israel President hian Hamas hrenbeh mekte chhuah phutna thu pawh a sawi ngei rin a ni a, Conference kar lakah hian Germany President Frank-Walter Steinmeier leh US Vice President Kamala Harris pawh a hmu nghal dawn a ni.