Venezuela-in an rama UN rights office khartir

Venezuela sorkar chuan an rama United Nations human rights body office chu South America-a eptu party-te pui leh vawrh larah puhin, office a khartir bakah, thawktute chu office chhuahsan turin ni thum hun a pe.

Venezuela khawpui, Caracas-a press conference neihnaah foreign affairs minister, Yvan Gil chuan he thu hi a puang a, Gil chuan UN High Commissioner for Human Rights local technical advisory office chu Venezuela-a inlungrual lohna thlen zawnga hma laah a puh a ni. "UN rights office hian a tih miah loh tur tiin, mimal leh helna kawnga chete puiin, ram inpumkhatna tichhe thei thilah a inrawlh a ni. Chuvangin, mipui hmaa an tih dik lohte an puan a, United Nations Charter an bawhchiat leh palzut zawng zawngte an pawm hma chuan office hi khar chhunzawm tur a ni ang," tiin a tarlang.

Sorkar hian UN rights office an khar chungchang hi UN hnenah an hriattir em tih hriat a ni lo a, UN spokesperson, Stephane Dujarric chuan office kharsak an nih chungchang chu Ningania briefing neihnaah a hriat ve chauh thu a sawi.

Venezuela-in UN rights office an khartir chhan hi Venezuela-a activist hmingthang tak pakhat, Rocio San Miguel man a nih chungchanga UN-in thil dik lo awma an hriat thu leh, chhuah leh vat tura an duh thu an sawi vang nia hriat a ni. Sam Miguel hi kar hmasa Zirtawpni khan airport immigration area-a a awm laiin man a ni a, prosecutor-te chuan Miguel hi President thah tumnaa ruahmanna siam kawngah a inhnamhnawih ve niin an sawi a ni.