Armenia PM-in an ram do turin Azerbaijan a inpuahchah niin a sawi

Armenia Prime Minister, Nikol Pashinyan chuan Azerbaijan chu Armenia nena indo turin a inpuahchah reng tih a sawi. He thu hi Armenia-Azerbaijan ramria buaina chhuak avanga Armenia sipai paliin nunna an chan hnuah a sawi chhuak a ni.

PM Pashinyan chuan,"Azerbaijan hian an sipai chakna hmangin ramria buaina tenau an chawhchhuah hnuah Armenia nena indo tak tak an tum niin a lang" a ti a, Azerbaijan lam thuchhuah siam dan leh an chet dan chuan a tichiang a ni, a ti. Azerbaijan hi Karabakh-a hnehna an chan avanga an phurna chuan Armenia ram ṭhenkhat chhuhsak tura an chet a hlauhawm phah a ni.

Azerbaijan President Ilham Aliyev chuan Nilainia a thusawinaah Armenia lam chu an ram chin ni lo chuhpuiah a puh a, Armenia ram chhung khawilai mah chu an chuhpui loh thu sawiin, Armenia lam pawhin Azerbaijan ram chin an rawn nekna chu titawp tura a duh thu a sawi zui. Armenia lam hian Azerbaijan tibuai zawnga chetlakna awm chu an chhan let zel tur thu a sawi bawk.

Armenia PM Pashinyan leh Azerbaijan President Aliyev-te hian nikum kum tawp khan inremna thuthlung ziah an inbeisei thu lo sawi tawh mah se, ram pahnih hi an la inrem thei lo a ni. Nikum September thlaa Azerbaijan lamin Armenia mi leh sa tamna Nagorno-Karabakh an lak let hnuah Caucasus ram pahnih inkar hian ziaawm lam a la pan hlei thei lo a ni.