US-in satellite beihna tur ralthuam siamah Russia a puh

United States of America (USA) national security spokesman, John Kirby chuan vanthengrenga awm, satellite-te beih nana hman theih ralthuam Russia-in a siam mek tih US intelligence-te'n an hriat thu a sawi.

Kirby hian Russia ralthuam siam chu tun dinhmunah hlauhawm leh hman theih ni nghal lo mah se, nakinah erawh astronaut-te tan thlenga a hlauhawm theih thu sawiin, an thu hriat chu an zir chian belh zel thu leh Europe-a an thawhpuite pawh an rawn thu a tarlang. "Russia-in ralthuam a siam hi van thengrenga dah theih a ni a, nuclear-a thuam emaw, nuclear hmang a nih leh nih loh erawh hriat a la ni lo. He ralthuam hi mihring beihna tur a ni em hriat a ni lo a, khawvel tana hlauhawma siam pawh a ni lo, mahse, khawvel pawna thlawk chho ṭhin, astronaut-te tan a hlauhawm dawn bakah, sipai leh mipuite hman theiha satellite siamte tan harsatna a siam thei bawk a ni," tiin a tarlang.

Russia erawh chuan US-in an puhna hi an pha thung a,"US hian Ukraine puih nana dollar maktaduai tel a pek chhuah theihna atan, Republican thunun House of Representatives a paltlang theihna atan a inthupna hmanrua mai a ni. White House hian eng thuthang nge a lentir leh ang tih hi lo thlir zel ang," tiin, Russia sorkar thupuangtu, Dmitry Peskov chuan a sawi ve thung.