London-ah Facebook khinna tur pawm

Facebook neitu, Meta laka thubuai theh luh, pound billion 3 chawi theihna tur chu London-a judge chuan thu tlingah a pawm a, thubuai hi 2026 ral hmaa ngaihtuah hman tur a ni. Facebook laka thubuai theh luttu hi dan zir, Dr. Liza Lovdahl Gormsen niin, Facebook hmangtu, mi mtd 45 te aiawhin thubuai hi a theh lut a ni.

Dr. Liza Lovdahl Gormsen hian 2023 khan Facebook lakah hian thubuai a lo theh lut tawh a, mahse, he thubuai theh luh erawh pawm a ni lo thung. Thubuai hi hmanni lawk khan siam ṭhain a theh lut nawn leh, Facebook chu a hmangtute tana dik lo taka thil kalpuiah a puh a ni. "Facebook hian a lenna leh a theihna hmangin, Facebook ni lo, Meta kaltlanga an ta ni tho si, Instagram leh third party application dangte hmangin a hmangtute data a la khawm ṭhin a ni. Hei hi Facebook hian duhthlan tur siam loin, Facebook hmang duh tana phalna pek ngei ngei ngai angin an kalpui a, a hmangtute data hi la khawmin, awmze nei zawkin advertisement pawh an siam leh a, heta ṭang hian hlawkna nasa zawk an nei leh zel a ni," tiin a tarlang. Facebook khinnaah hian February 2016 leh October 2023 inkara Facebook account nei zawng zawngte tan Dr. Gormsen chuan compensation pek tur, pound billion 2.07 aṭanga 3.1 a phut a ni.

Thubuai hi Competition Appeal Tribunal-ah ngaihtuah tur a ni a, thubuai theh luh kawngah hian investment management fund company pakhat, Innsworth chuan sum faiin a ṭanpui a ni. Innsworth hian tun hmain Mastercard, Ericsson leh Volkswagen laka thubuai theh luhah a lo pui tawh ṭhin a ni.

Hetih lai hian Meta hian puh an nihna chu ṭan chhan mumal nei lo leh, thiam loh an chan loh nan theihtawpa an beih let tur thu an sawi a,"Mipuite chu thuneihna tam zawk pek tumin kan thil siamah ṭan kan la a, kan platform hrang hranga an data te pawh anmahni duhthlanna ngeia dah leh dah loh theihin kan kalpui vek a ni," an ti. Meta hian 2023 khan privacy chungchanga thubuaiah US aṭanga Facebook account neite hnenah pound million 583 a lo chawi tawh a ni.