Oct. 7-a Israel beihnaa tel UNRWA staff hming puang

Israel defence minister Yoav Gallant chuan October 7-a Hamas firfiakte'n Israel an beih ṭuma tel, UNRWA staff 12-te hming a puang.

Israel chuan Palestinian raltlante chhawmdawlna hna thawktu, UN agency UNRWA chu Hamas firfiak pawl thlawpah a lo puh tawh a, nikum October thlaa firfiakte'n Israel an beih ṭum pawh khan an staff-te hian an zingah bakah, inbeihnaah tel ngei pawh an awm niin a lo sawi tawh a ni. Hei vang hian khawthlang ram eng emaw zat chuan UNRWA tana fund an pek pawh titawp lailawkin, Israel-in a puhna hi chhui chian phawt an tum thute an lo sawi tawh bawk. Fund titawp zingah hian US leh Britain-te pawh an tel. United Nations pawhin UN agency puhna chungchang hi independent panel chhui chiantir a nih tur thu a lo sawi tawh bawk.

UNRWA staff zingah Hamas-te pawikhawihna thlennaa tel zingah hian sikula thawkte pawh an tel a ni. Gallant chuan, "Heng mi 12-te bakah hian, thu rintlak tak kan dawn aṭangin UNRWA worker 30 chuang chu Israel mite beih, rawk leh ruk bonaah pawh an inhnamhnawih bawk a ni," a ti.

Gallant chuan UNRWA chuan a hlutna leh a nihna a hloh tawh a, UN body angin a awm tawh lo niin a sawi. Hei vang hian IDF leh defence lam pawh Gaza Strip-a chhawmdawlna semna kawngah mawhphurhna chu humanitarian organisation dang kuta dah tura a hriattir tawh thu a sawi bawk.

Gaza Strip-ah hian UNRWA hnuaia thawk hi mi 13,000 vel an awm. Gallant chuan thawktu zingah 12% chu Hamas leh Palestinian helpawl dang, Islamid Jihad pawl hnuaia mite an ni, a ti. 'Thawktu zinga 1,468 chu Hamas leh PIJ hnuaia ngawrh taka thawk ṭhin a ni a, UNRWA worker 185 chu Hamas military branch-ah an active hle a, PIJ military branch-ah pawh worker 51-te hi an active hle bawk a ni," a ti.

Nasser Hospital-ah ralthuam tam tham tak man

Israel Defence Force (IDF) sipaite chuan Gaza Strip chhim lam, Khan Yunis khawpui thlang lam an beihnaah Hamas firfiak 20 an that a, Nasser Hospital chhungah ralthuam thuhruk ṭhahnem tham tak an man bawk.

IDF chuan sipaite hian Hamas-te hmun pawimawhte beiin, firfiak eng emaw zat an tihhlum tawh bakah, Khan Yunis area-ah hian ralthuam tam tak an hmu chhuak tawh tih an sawi. Khan Yunis-a ralthuam hmu chhuaktute hi 7th Brigade Combat Team fighter-te an ni.

Israel commando-te hian Nasser Hospital pawh dap zui zelin, ralthuam thuhrukte an hmuchhuak bawk a ni. Gaza healh ministry chuan Nasser Hospital hi hna thawk thei loin a awm tawh niin a sawi a, hetih lai hian he hospital-ah hian damlo 200 vel an la awm mek niin a sawi bawk.