Russia sorkarin Navalny suntu mi 400 chuang man

Russia president, Vladimir Putin sawiseltu langsar tak Alexey Navalny thih thuin an hriat hnuah, Russia mipui tam tak chuan Navalny sunna leh zahna lantir nan hmun hrang hrangah hun an hmang a, Russia sorkar chuan Navalny suntu zinga mi 401 te chu a hreng mek niin an sawi.

Navalny thih thu hi Zirtawpni tlai khan hriat a ni a, thuneitute chuan Navalny hi “Polar Wolf” Arctic penal colony-a a kal laiin nikhaw hre loa a tluk hnuah a thi niin an sawi. Navalny thihna avanga hian Russia mipuite chuan hmun hrang hrangah amah sunna hun an hmang a, police-te hian khawpui 36 aṭangin mi 401 manin an hreng mek a ni. Police-in an mi hren zingah hian Saint Petersburg aṭangin mi 74, Moscow aṭangin mi 49 an tel niin OVD-Info chuan an tarlang. OVD-Info chuan police department tinah an mi hren zat hi report aia tam an awm an rin thu an sawi a,"Kan hriat chian leh an hming kan tarlan theih chinte chauh hi police-in an hren zat angin kan tarlang a ni. Tun dinhmunah Navalny sunna hman avanga police-in an mi hren zat hi chiang taka hriat theih a ni lo," tiin an sawi bawk. Russia khawpui, Moscow-a Navalny sunna lantir nana bati chhit leh pangpar dahte chu lak sawn vek an ni a, Soviet hunlaia tualchhung buaina avanga thite thlana pangpar dahte chauh hmuh tur a awm tawh a ni.

Navalny hi kum 47 mi niin, Russia rama Putin-a rorelna sawiseltu leh beitu langsar ber a ni. A thih lai hian kum 19 tang tura hrem niin, Polar Wolf tan inah kum 2021 aṭang khan dah a ni. Navalny thih chungchangah hian amah zuitute bakah khawvel ram dang hruaitute aṭang pawhin uitu leh suntu a ngah hle a, a nupui, Yulia Navalnaya chuan a thih hnu lawk hian Germany-a Munich Security Conference-ah thu sawiin, Putin-a rorelna tiawp turin ram dang hruaitute chu a sawm a ni.