ICJ in Israel chungchang a ngaihtuah ṭan

United Nations General Assembly (UNGA) chuan 2022 December khan International Court of Justice (ICJ)-ah Israel-in kum 57 chhung zet Palestinian ram a luah chungchang ngaihtuah tura thu a lo tihthluk tawh bawhzuiin, ICJ chuan Pathianni aṭang khan a ngaihtuah ṭan.

Israel-in Palestinian ram a luah chungchangah hian ICJ chuan thurawn a pe dawn a, Israel lam tan hian zawm ngei ngei a ngai lo a ni. ICJ hian Israel chungchang hi February 26 thleng a ngaihtuah dawn a, chumi hnuah thurawn pe tur hian thla engemaw zat a ngaih rin a ni.

ICJ hmunpui Hague-ah an thu khel tur chungchang hi ngaihtuah a ni a, ram 52 leh international organisation pathum an tel a ni. Palestinian Foreign Minister, Riyad al-Maliki chuan thubuai ngaihtuahna hi a sawi hawng bawk. ICJ thu ngaihtuah tur hian ni ruk chhung a awh dawn a, hemi hun chhung hian Israel-in Palestinian ram a luah avanga thil thleng hrang hrang sawiho a ni dawn a, hetah hian dan lam thlirna aṭangin Israel chet dan chu a dik tawk em tih pawh sawiho a ni ang. Israel in Palestinian ram a awp zingah hian kum 1967 aṭanga a awp West Bank, Gaza leh East Jerusalem te chu thlurbing bik an ni dawn a, hei hi Palestine-in anmahni ram chhung china a chhal a ni.

Amnesty International chuan thuchhuah siamin, Israel chuan an ram chin ni lo an awp mek chu mihring dikna chanvo humhim a nih theih nan leh inhuatna a tawp theih nana tihtawp vat a ngaih thu an sawi. Agnes Callamard, Amnesty International secretary chuan Israel-in Palestinian ram a awp chhungah hian mimal dikna chanvo inrahbehsakna a thleng nasa hle tih a sawi a, heng thil duhawm lo tak tak a thlen chhunzawm zel loh nan Israel kut aṭang hian Palestine ram an luah mek hi lak let vat a ngai tih hi khawvelin an hriat a ngaih thu a sawi bawk.