US: Georgia Senate seat chuh tur Indian-American Ashwin Ramaswami

US-a Georgia senate seat inthlanna neih turah kum 24 mi, Democrats lam, Indian-American Ashwin Ramaswami chuan a din tur thu a sawi. Georgia-ah hian Republican mi, Shawn Still chu senator a ni mek a ni.

Ashwin Ramaswami hi Georgia senate seat aṭang hian thlan tlin a nih chuan Indian-American zinga Gen Z (Kum 1997 leh 2012 inkara piang) kan tih mai, US-a state emaw federal legislature-a ding hmasa ber tur a ni dawn a ni. Ashwin Ramaswami chuan Georgia senate seat a chuh tur chungchangah hian,"Ka chenna chhehvela mihringte tana thil eng emaw tal pek let ve ka duh avangin senate seat hi ka chuh dawn a ni. Tu pawhin sawi theih kan nei a ni tih lantir te, ṭhalai zawkte bakah, dinhmun chhe tak aṭanga lo chawr chhuak te, hausa leh a theite chauh ni loin, a duh apiangin kan ai an awh thei tih hi lantir ka duh a ni," tiin a sawi.

Ramaswami nu leh pate hi Tamil Nadu aṭangin kum 1990 khan US-ah hian an pem a, Ramaswami hian zirna lamah computer science leh law a zawh bakah, election security and technology-ah te thawkin, policy research te a nei tawh bawk a ni. Thlan tlin a nih chuan Gen Z anga ram rorelnaa mellung pawimawh tak a nih dawn bakah, Georgia state legislature-a Indian-American awm thei hmasa ber a ni dawn bawk a ni.