Papua New Guinea-a tribal kara buaina chhuakah mi 64 thi

Papua New Guinea ram hmar tlang dunga tribal chengte inkara buaina chhuakah mi 64 an thi tawh. Papua New Guinea-a police officer pakhat chuan tun hnaia Pacific chhehvel rama ṭum khata inthahna a nasat ber ṭum niin a sawi.

Tribal intibuaite hi Ambulin leh Sikin te niin, buainaah hian an hnam thlawptute ve ve an tel bawk. Police-te chuan Pathianni tlai khan Wapenamanda district-a Enga province-ah buaina hi a chhuak ṭan niin an sawi. Nimin zing thleng khan police-te chuan Wapenamanda hmunah hian kawngsirah ruang 64 an chhar tawh niin an tarlang a, buaina chhuakah silai (AK47 leh M4) hman a nih thu an sawi bawk. Chanchinthar la khawmtu ṭhenkhat chuan buaina kaihhnawihah hian ruang tam tak truck hnunga an dah khawm lai thlalak leh video-te an dawng.

Papua New Guinea military-te chuan helai chhehvelah hian sipai 100 an tir lut nghal a, mahse, sipaite hi an tlem zawk avang leh ralthuam pawh tribal intibuaite hian an ngah zawk avangin engmah an ti thei lo thung. Australian Broadcasting Corporation (ABC) chuan tun ṭuma tribal intibuaite hi nikuma Enga province-a tribal intibuai, mi 60 lai an thih phahnaa inhnamhnawihte bawk kha an nih thu an tarlang.