Israel-in March 10 hmaa an mi hrente chhuah turin Hamas a vau: "An mi hrenbeh mekte an chhuah loh chuan Rafah beih a ni ang"

Israel war cabinet minister Benny Gantz chuan Palestinian firfiak pawl, Hamas chuan Israel mi an hrenbeh mekte chu March 10 hmaa an chhuah lo a nih chuan Rafah khawpui chu lei lam aṭangin beih a ni dawn, tiin a sawi.

Egypt ramri hnaiha awm Rafah khua hi Palestinian mtd 1.5 chuangin inhumhimnan an hmang mek a ni. Khawvel ram hrang hrang chuan Rafah beih a nih chuan insuatna rapthlak tak a thlen an ring a ni.

Israel-in Hamas-ten an ram an beihna chhang let a, Gaza Strip-a beihpui a thlak meknaah hian nunna chan an pun belh zel a, mi 28,000 chuangin nunna an chan tawh nia sawi a ni. Egypt, Qatar leh US ten remna a awm theihna atan hma la reng mah se, tun thleng hian an hmalakna hian awmzia a la neilo. Israel ṭhianṭha US chuan Benjamin Netanyahu kaihhruai Israel sorkar chu civil mi nunna laksak tawh lo turin ngen ṭhin mah se awmzia vak a neilo niin a lang.

Israel-Hamas buaina chungchang:

- Israel sorkar chuan Hamas chu Israel mi an hrenbeh mekte March ni 10 hma a chhuah turin a ti a, an thusawi hi an zawm lo a nih chuan Israel Defence Force-te chuan lei lam aṭangin Rafah khua chu an bei dawn tiin an vau. Hamas hian an hren zinga a tam zawk hi Rafah khawpuia hian an hreng mek niin Israel chuan a sawi.

- Benny Gantz chuan Rafah-a beihpui thak a nih hnuah civilian thi leh hliam an tam lohna turin, Israel leh a thawhpui US leh ram dangte nen civil mite thiar chhuah hna an thawk niin a sawi.

- Egypt chuan an ramchhungah Palestinian raltlan an awm a phal loh thu a sawi. Hei hi Israel in Rafah a beih chuan Palestinian mi tam tak in Egypt chu tlanchhiatna atan an hman a hlauh vang a ni.

- Thuthar thehdarhtu hrang hrang chuan Israel in Gaza a Palestinian awmte chu nawr chhuah a, Israel mi leh sate chu dahluh an tum niin an sawi.

- Gaza-a Israel-Hamas indo a thlen hnu hian a ṭumhnihna turin, International Court of Justice (ICJ) chuan Thawhṭanni khan Gaza-a Palestinian mipuiin tawrhna chungchang a ngaihtuah.

- ICJ hian United Nations General Assembly (UNGA), Israel leh Palestinian aiawh te hnen aṭangin an ṭanchhan te a ngaithla. Thubuai ngaihtuah hi UNGA lamin Israel-in Gaza an awp avanga a nghawng hrang hrang bakah Jerusalem chungchangah ICJ thurawn a ngen hnuah neih a ni.

- Palestinian Foreign Affairs Minister Riyad al-Maliki chuan ICJ-ah a ngaihdan sawiin ,"Gaza-a Palestinian mtd. 2.3, heng zinga a zatve naupang chu man, thah, rilṭama hrek leh awmna sawnsak an ni. West Bank-ah mi mtd. 3.5, Jerusalem huamtelin, Palestinian-te chu an ram laksak an nih bakah hnam avangin kut an tuar ṭhin a ni" a ti.

- Riyad al-Maliki chuan ICJ thutlukna chuan Gaza-a remna leh muanna a awm theihnan beiseina tlem a siam thei niin a sawi. ICJ thutlukna hian Israel leh Palestinian-te chu ṭhenawm inngeih tak anga an awm theih nan a pui thei dawn niin a sawi.

- Israel Prime Minister Benjamin Netanyahu chuan ICJ thu ngaihtuah chu Israel tan awmzia a awmloh thu a sawi a, ICJ thuneihna chuan huamchin a neih angin Israel chuan ICJ rorel chu engpawh ni se a pawmpui dawn lo tih a sawi.

- Netanyahu chuan,"Hague-a Israel chungchang ngaihtuah a ni hi Palestinian ten inbiakna tel loa inremna neih an tumna mai a ni" a ti.