Argentina-in kum 20 chhunga mirethei tam ber ṭum an tawng

Zirchiannain a tarlan danin January thla khan Argentina rama cheng mipui mtd. 46 zingah za zelah 57.4% (mtd. 27) chu mirethei an ni tih tarlan a ni, heng zing 15% tan chuan nitin eikhawp neih pawh a harsat thu a tarlang. Hei hi kum 20 chhunga Argentina ram a mirethei an tam ber ṭum a ni.

Zirchianna hi Catholic University of Argentina ten an neih a ni. An zirchianna neih hian a huamzau leh, an thil zirchian a chipchiar zawk avangin Argentina national statistics agency INDEC aiin an rintlak zawk ni a ngaih a ni.

University hian retheih tehfungah thil hrang hrang an hman avangin politician leh economist-te chuan a rintlak tawk loh niin an sawi ve thung. Zirchiangtu zinga mi Eduardo Donza chuan,"Thil man sang zel chu kar lo awm turah hian a zia awm beisei a ni, mahse a nghawng chuan Argentina chu a la tibuai chhunzawm zel dawn, March thla ral hma hian Argentina mipui za zela 60 hi mirethei huangah an luh rin a ni" a ti.

January thlaa Argentina rama mirethei an pun chhan hi sorkar in nikum December 10-a an pawisa, Argentine Peso hlutna a tihhniam vang a ni. Hemi avang hian ei leh in, services leh thildang man a pun phah nasa hle. Zirchianna chuan sorkar aṭanga hamṭhatna dawng ve lo hnathawktu leh middle-class chhungkuate chuan a nghawng an tuar na ber tih a tarlang.

Zirchianna tlangzarh a nih hnu hian inhnialna a chawk chhuak rang hle a, Vice President hlui Fernandez de Kirchner chuan an harsatna tawh mek chu President hlui Mauricio Macri kaihhruai sorkar chuan hna a thawh ṭhat tawk loh vang a nih thu a sawi. Hetih lai hian President Javier Milei chuan Argentina rama mi 10 zela mi paruk mirethei an nih chhanah kum 20 chhung an ram lo kaihhruaitute a dem thu a sawi thung.