Red Sea-ah Houthi helpawl lak him nan European Union in Naval mission an nei dawn

Yemen-a inkhuar Houthi helpawlten Red Sea a lawng veivak te an beih ṭhin avangin European Union chuan lawng sipai chakna hman an tum.

EU hian Red Sea-a naval naval mission a neih turah hian indo lawng a tir dawn a, hei bakah Red Sea, Gulf of Aden leh a chhehvel tuipuia hman tur inralrinna leh mihring chevel enfiah theihna a dah tel dawn a ni.

Italian Foreign Affairs minister, Antonio Tajani chuan Belgium-a foreign minister hrang hrang inhmuhkhawmnaah lawng sipai chakna hmang tur hian thu an tihtluk thu a sawi a, an hmalakna chu Europe ram himna atana pawimawh a nih thu a sawi.

European Commission President, Ursula von der Leyen pawhin EU in Red Sea-a lawng sipai chakna hman a tum chungchang hi X lamah a tarlang ve bawk a,"Europe ramte chuan Red Sea-a zalen leh him taka kaltlang theih hi a ngai pawimawh a, chumi tur chuan khawvel ram dang a thawhpuite nen hma kan la a ni" a ti.

European ram zinga ram hausa leh thiltithei France, Germany, Italy leh Belgium-te chuan lawng an thawh tur thu an tichiang tawh. Red Sea-a lawng an tirh tur pakhat Aspides vessels, Greek khawpui pakhat Larissa aṭanga kaihruai tur chuan Houthi helpawl beihna chhanglet nghal turin thu pek a ni tawh a, mahse kah hmasak erawh phalsak an ni rih lo thung.

Red Sea hi sumdawng lawng mai bakah sipai lawng tam tak in nitin an paltlang a, tuipui kawng pawimawh tak niin khawvel sumdawnna 12% hi Red Sea kaltlanga neih a ni. Nikum November aṭang khan Houthi helpawl hian an bei nasa hle a, Israel nena inkungkaihna nei lawngte chiah an bitum thu sawi mah se, EU hotute erawh chuan helpawlin lawng an beih ṭhin avang hian Israel nilo in Egypt ram chuan a tuar ber tih a sawi. Lawng veivak a tlem zel avang hian Egypt chhiah hmuh ṭhin chu 40% in a tlahniam tih an sawi.