US-in Gaza inkahhai puan tumna veto hmangin a dang
United Nations Security Council (UNSC)-in Gaza Strip-a Israel-in beihpui a thlak mek chungchanga resolution siam a tum chu US chuan veto hmangin a hnawl, resolution hian Israel-Hamas indo mek chu inkahhai puansak a tum a ni.
Arab ram pakhat, Algeria chuan resolution hi UN Security Council-ah hian pu lutin Thawhlehni khan vote turin a chhawpchhuak a, mahse, beisei lawk ang ngeiin Israel ṭhian ṭha, US chuan veto hmangin a lo hnawl a ni. US hian resolution hi an thlawp dawn lo tih sawiin, UNSC-ah hian resolution dang put luh tumin an buatsaih mek tih an sawi. US hi veto power nei ram panga zinga resolution dodaltu awmchhun an ni a, veto power nei Britain erawh chuan vote a thlak lo thung.
Algeria palai, Amar Bendjama chuan resolution sawi hawnna a neihah an resolution chu dikna leh mihring zahawmna humhim a nih theih nan a pawimawh thu a sawi a, resolution thlawp lo zawnga vote thlak chuan tharum thawhna leh Palestinian mipui tawrh mekna chu an pawmpui tihna ni dawn a ni, a ti. Algeria hian kar hnih liam ta aṭang khan resolution hi sawiho a nih theih nan hma an lo la tawh a ni.
US hian resolution dang an buatsaih ve mek thu leh, resolution an put luh tur hian Israel chu lei lam aṭangin Rafah bei lo tura tihna a awm dawn a, tun dinhmunah chutiang beihna chu UNSC chuan a remtihpui thei lo niin a sawi. US-in a hnawl tak, Algeria resolution put luhah hi chuan inkahhai puan nghal a phut ve thung a, chumi bakah chuan an mi hren zawng zawng chhuah zalen a phut bawk. Israel chan chhiat theihna resolution reng reng chu US hian a pawmpui ngai mang lo. October 7, 2023-a indo ṭan a nih hnuin UNSC lakah hian ṭum hnih lai Israel ep resolution chu a veto hmangin a lo hnawlsak tawh.
UN Security Council-a ram awm zinga 13 chuan indo tihtawp lailawk phutna resolution chu a pawmpui lamah an vote. Resolution pawm a nih theih nan hian a thlawp zawngin vote 9 tal mamawh a nih bakah veto nei ram panga US, UK, France, Russia leh China te'n an veto thiltihtheihna hmanga an dan loh a ngai a ni.