Pakistan PM thar tur Shehbaz Sharif, President atan Zardari

Pakistan Muslim League-Nawaz (PML-N) leh Pakistan Peoples Party (PPP) te chuan ṭangrual sorkar siam tura inremna neiin, Pakistan-a February 8-a inthlanna neih a nih hnuah sorkar thar an siam thei dawn niin an sawi. PPP chairman, Bilawal Bhutto-Zardari chuan prime minister hna chelh lailawktu, PML-N president, Shehbaz Sharif chu Prime Minister a nih chhunzawm tur thu sawiin, PPP co-chairman, Asif Ali Zardari chu president atana party pahnih-te joint candidate a nih nghal thu a puang.

Bilawal chuan,"PPP leh PML-N te chuan sorkar siam tura member neih ngai zat kan tlin tawh a, sorkarna siam turin kan inpeih tawh a ni," tiin, assembly atana member an neih zat erawh a tarlang lo thung. PML-N nena ṭangrual sorkar siam an tlin thu leh an inbuatsaihna chuan inthlan neih zawha 'hung parliament' avanga ram sum leh pai dinhmun chhe sa tak, Pakistan market chu a ṭha zawnga a nghawng a beisei thu a tarlang bawk.

Prime Minister atana ruat, Shehbaz Sharif chuan party pahnih hruaitute chu inremna siam theia inbiakna an neih avangin lawmawm a tih thu a sawi. Pakistan assembly-a sorkar siam tura majority an neih theih chungchangah, Shehbaz chuan sorkar an siamna tura tel ve, Muttahida Qaumi Movement-Pakistan, Istehkam-e-Pakistan Party, leh Pakistan Muslim League-Quaid te chu lawmthu a hrilh bawk a ni. Shehbaz Sharif hian February 8-a inthlan an neih hma thla 16 chhung khan Pakistan Prime Minister hna hi a lo chelh tawh a ni.