Israel beihna vangin mi pahnihin nunna an chan : Syria

Syria khawpui Damascus-a veng pakhat chu Nilaini zing kar khan Israel missile chuan a kap fuh niin Syria state TV chuan a sawi a, mi pahnih an thih bakah thil tam tak a chhia niin a tarlang bawk. Mahse Israel lam hian missile hi an kah chhuah a nih thu an la sawi lo thung.

Syrian Observatory for Human Rights hotu Rami Abdurrahman chuan mi pahnih nunna chan hi in chhunga awm lai a nih thu a sawi a, tute nge an nih tih erawh a sawi chiang lo thung. Israel missile hian Kfar Sousseh veng chu khawthlang lamah a deng fuh a, chenna in chhawng 10-a sang tichhiain a bulhnaia motor eng emaw zat chu a chhe tel bawk. Heng zingah hian naupang sikuk bus pawh telin, bus-ah hian chuang an awm lo hlauh a ni.

Israel hian Syria hi tunhnaiah a bei fo a, Iran thlawp helpawl Hezbollah chu an bitum ber an nih thu sawiin, hei hi Hezbollah-te'n Syria sipaite pui turin an mi leh sa tam tak an tirh luh vang a ni. Thla hmasa khan Israel chuan Damascus khawthlang lama veng pakhat Mazzeh chu a lo bei tawh bawk a, Mazzeh-ah hian Iranian Revolutionary Guard-te'n tawmhimna atan an hman ṭhin in an tihchhiat bakah Iran mi pangain nunna an chan bawk.

Iran-in gas pipeline beiah Israel a puh

Iran chuan kar liam ta khan gas an lak luhna pipeline chu Israel-in ṭum hnih a bei niin a puh a, hei vang hian ramchhunga province ṭhenkhatin harsatna an tawh phah a ni.

Iran Oil Minister, Javad Owji chuan Nilainia cabinet meeting an neihnaah an ram gas pipeline chu Israel beih ngei a nih thu a sawi. Chaharmahal leh Bakhtiari province-a gas pipeline chu February 14 khan bomb hmanga beih a ni a, thi leh hliam awm lo mah se, North Khorasan province, Lorestan province leh Zanjan province- ah gas supply a khaihlak phah a ni.

Israel hian an thiltih a ni tih a la sawi lang lo a, ram pawn beih a nih hian an inhnamhnawih thu an sawi lang ngai mang lo. Iran lam hian beih an tawh hian Israel thiltih niin a puh deuh tlangpui thung. Israel hian Iran hi a bei fo a, mahse, hengah pawh hian nuclear siamna hmun leh sipai hmunpui an bitum tlangpui ṭhin.