Taliban-in thil nung thla laksak sual a nih thu sawi

Afghanistan-a Taliban sorkar chuan journalist-te chu thla an lak ṭhin avanga thil sual tiah a puh.

Taliban sorkara justice ministry senior official, Mohammad Hashem Shaheed Wror chuan Kabul-a department staff te tana seminar buatsaihah thlalak chu sual lian tak a nih thu sawiin,"Media lama thawk kan ṭhiante chuan he thil sual hi an ti reng a, thil mawi lo takah an inhnamhnawih reng tihna a ni," tiin a sawi.

Taliban pian chhuahna hmun, Kandahar-a official-te chu tun kar hian thil nung eng chi mah thla la lo tura hriattir an ni a, mahse, he khapna hian media leh mipui nawlpuite a huam lo thung.

Kum 1996 aṭanga 2001 chhunga Taliban-in rorelna an chelh lai khan thil nung thla lak leh TV-a chhuah ṭhin chu khap niin, 2021-a sorkar rorelna an chelh leh hnuah erawh he dan hi hman a la ni leh lo. Mahse thuneihna an chan leh hnu hian media outet eng emaw zat chuan thil nung thlalak hi an dah lang tawh lo a ni. Hetih lai hian Taliban sorkar hnuaia department ṭhenkhat chuan official-te leh ram dang palaite inkawmna thlalak an theh darh fo thung.

Islamic art-ah hian mihring leh ramsa thlate hi dah a ni ngai lo a, hei hi Muslim ṭhenkhat chuan thil nung hrim hrim thlalak khapna angin an kalpui a ni.