Biden-a'n student loan USD 1.2 billion a ngaidam

US president Joe Biden chuan student loan la, mi 153,000 te'n an loan bat, USD tld 1.2 chu ngaihdam a nih tur thu a sawi.

President Biden hian nikum khan student loan USD tld 430 zet ngaihdam a, sorkarin a rulhsakna tur ruahmanna a siam a, mahse, he ruahmanna hi Supreme Court chuan a lo dansak tawh a ni. Biden chuan,"College degree neihna atan American mi tam tak hian an rulh sen loh tur ba an neih phah a ni. Nun nuam zawk nei turin college kal hi kawng ṭha tak ni mah se, chu kawng zawh man chu a to em a ni," tiin a sawi.

Biden kaihhruai sorkarin student loan ba a rulhsak turah hian Saving on a Valuable Education (SAVE)-a inziak lutte leh, dollar 12,000 leh a aia tlem loan laa, kum 10 chuang lo rul tawhte a huam dawn a ni. White House thupuangtu chuan he hmalakna hian community college-a kalte leh loan tam tham la lote, zirlai loan ba neite'n zirna kawng an zawh chhunzawmna turah a pui thei dawn niin a tarlang.

Sorkar hian SAVE hnuaia loan a rulhsak tur ṭhenkhatte chu email a thawn ṭan tawh a, SAVE kaltlang hian student loan USD 1.2 bn zet chu a thawh khatnaah hian ngaihdam a ni phawt dawn a ni. SAVE-ah hian mi mtd. 7.5 zet an inziak lut a ni. President a nih chhungin Biden hian American mi maktaduai 3.9-te'n university education atana student loan an lak, USD tld 138 vel chu a ngaidam tawh a ni.