Israel-in Rafah hmun ṭhenkhat a bei

Israel chuan inbiakna neih mek ni mah se Ningani khan Rafah chu boruak aṭangin a bei. Palestinian raltlan tam takte tawmna hmun Rafah-ah hian Israel chuan a sipai tirh luh a beihpui thlakah a lo vau tawh a ni.

Gaza chhim lama awm Rafah hian bomb bakah boruak aṭanga beih a tawk niin thuthar thehdarhtute chuan an sawi. Gaza Civil Defence Agency chuan thi leh hliam an awm thu sawi mah se, engzat chiah nge an nih tih erawh a tarlang tel lo thung. Israel Army chuan thuchhuah siam ve nghalin an thil kah chhuah chuan helpawl tawmbuk ṭhenkhat a bitum thu sawiin, an bitum tawmbukte chu helpawl lamin Israel beih nan an hman ṭhin thu leh, civil mi hliam leh tihnat chu an tum a nih loh thu an sawi. Israel lam hian Hamas te'n mipui hmunhma, a bikin damdawi-in chu Israel beihna atana inkhuar nan an hman ṭhin thu vawi tam tak an lo sawi tawh a ni.

Nikum October 7 hnua bul ṭan, Israel-Hamas indona hian ziaawm lam a la pan hleithei lo a, indona a chhuah hnu hian Hamas lam hian an ram hmun tam tak chan tawhin an mi leh sate pawh ṭampui tuar thei an nih thu UN chuan a sawi. Israel war cabinet member, Benny Gantz chuan, Israel leh Hamsa indo mekna karah inkahhai puang tura inremna kawng zawn mek a nih thu a sawi a, mahse, Hamas lamin Gaza-a an hren mek, Insrael mite chhuah an remti dawn lo a nih chuan Muslim-in hun thianghlim an hman tur, Ramadan laiin Rafah chu beih a ni ang, tiin a sawi.

West Bank-a inkahna thlengah Israel mi pakhat thi

Israel-in a awp, West Bank-a kawngpui pakhat checkpoint bulah Ningani khan mi tu tih hriat loh pathumin silai hmet puakin, mi pariatin hliam an tawrh bakah, Israel mi pakhat a thi niin police-te chuan an sawi. Police-te chuan silai hmet puaktute zinga pahnih hi an kah hlum ve nghal thu sawiin, pakhat hi a hnuah man a ni a, thu zawh fiah tura an hreng mek.

West Bank-a mipui pawi sawi lo kahna thleng hi Palestinian thil tih niin Israel police-te chuan an sawi a, hemi chungchangah hian Israel National Security minister Itamar Ben-Gvir chuan Palestinian reng reng chu khuahkhirhna siamsak an ngai tiin, "Palestinian te zalenna ai chuan kan nunna a hlu zawk," a ti. Jerusalem hnaih tak kawngpui, mi tamna lai taka inkahna thleng hianWest Bank-a mipuite manganna a tarlang niin mi ṭhenkhat chuan an sawi a, kar hmasa lawk khan Israel chhim lama bus stop-ah police-te chuan Palestinian nia an hriat mi pahnih an lo kap hlum tawh a ni.

Israel-in Gaza a beih duh lohna New York-ah lantir

US-a Palestinian lamṭangte chu American Israel Public Affairs Committee (AIPAC) pisa kawtah an pung khawm. New York khawpuia pungkhawmte hian Israel-in Gaza-a beihpui a thlak mek duh lohna an lantir a, hemi bakah hian AIPAC chu inkahhai puanna tura inbiakna tibuaitu niin an puh bawk a ni.

Lungawi lohna lantirtu mipui pungkhawmte hian Palestinian mipui ṭan zawng leh AIPAC demna lam thuziak chi hrang hrang an keng lang a ni. Anti war group, Jewish Voice for Peace chuan Juda mi 18 chu Democratic senators pahnih Chuck Schumer leh Kirsten Gillibrand pisa kai tur an dan avangin police in an man thu an sawi.