Doctor-te nawrh avangin South Korea damdawi inte'n inzai tur an cancel nasa

South Korea-a trainee doctor-te'n health reform siam tur an duh lohna lantir a, an hna chawlhsana nawrh an huaihawt avangin damdawi in hrang hrangte chuan inzai hun tur sawnin, tam tak chu cancel a ni bawk. Inzai tur cancel-sak zingah hian cancer vei enkawl laite pawh an awm.

Trainee doctor nawrh huaihawtnaa telte hi mi 9,275 an tling a, hei hi South Korea ram puma doctor naupang zawk hmun thuma ṭhena hmun hnih zet an tling pha a ni. Doctor-te hian sorkarin ruahmanna thar siam chu ṭha an tih loh thu an sawi. South Korea sorkar hian an rama damdawi lam inenkawlnain hma a sawn theih nan medical school-a zirlai zir thei zat tihpun a tum a ni. Hei hi doctor-te chuan service chungchang thua thil ṭha lo tak a nih theih thu leh, doctor zirte thiamna a chhe zawnga nghawng thei niin an sawi.

South Korea president Yoon Suk-yeol chuan doctor nuar mekte chu an hna chhunzawm leh vat turin a hrilh a, nawrh huaihawt leh bultumte chu zawng chhuak a, man an nih tur thu a sawi. President chuan,"Dan kalha a huhoa an chetna avanga nunna chan leh damlo hriselna chhiat phah an awm a nih chuan, trainee doctor -te hian mawh an phur ang" tiin a sawi bawk.

Public survey neihna aṭanga a lan danin South Korea mipui tam zawk chuan sorkar hmalak tumna, medical school-a zir thei zat tihpun hi an thlawp a, hetih lai hian doctor nuar mekte erawh chuan South Korea-in doctor a ngah tawk thu leh, sorkar chuan doctor awm sate hlawh tihpun leh hna tihtlem lamte chu a ngaihtuah hmasak a ngai niin an sawi thung.

Doctor nuarte'n hna an chawlh avang hian South Korea khawpui, Seoul-a damdawi in lian ber ber pangate chuan inzai thei zat an tihtlem phah bakah, inentir thei zat pawh an tihtlem thu an tarlang a ni. Central Seoul-a Severance hospital chuan inzai tur hi a chanve chiah an la rih a, St Mary’s Hospital leh Asan Medical Center te pawhin inzai tur an lak ṭhin pangngai aia 30% -in an titlem ve bawk. Doctor-te nawrhna avang hian inenkawlna mamawh, damdawi in lamin an enkawl leh buaipui theih loh zingah hian cancer bakah raipuarte pawh an tel a ni.