Rangkachak laihna khur chimah mi 23 thi

Central Venezuela-a phalna nei loa rangkachak laihna khur siam pakhat chu chimin, mi 23 an thih bakah mi eng emaw zatin hliam an tuar. Thuneitute chuan rangkachak khurin a chim hnan, a chhunga tang an awm an rin thu an sawi bawk.

Bolivar state governor, Angel Marcano chuan khur chim aṭang hian ruang 14 an lak chhuah tawh thu leh, chhanchhuah hna an kalpui chhunzawm zel thu a sawi bawk. Ranglachak khur chimna hmun hi Angostura municipality chhung a ni a, he rangkachak khur hi Bulla Loca tia hriat a ni. Rangkachak khur laihnaa thawk chhungte chu helai hmun hnaih ber, La Paragua-ah kal khawmin, sorkar chu hliam leh mitthi ruangte a rang thei ang bera la chhuak turin a ngen. Rangkachak khur laihna awmna avang hian ruangte hi a ṭawih ral vat hlauhna a nasa hle a ni. Bulla Loca-a hian mi 200 vel an thawk nia hriat a ni a, he lai hmun hi khaw hnai ver, La Paragua aṭangin lawnga darkar sarih kal ngai a ni.

Venezuela sorkar hian 2016 khan an ram hmun laili tan tlangin, rangkachak leh oil khur laihna tur hmun ruahman bik a siam a ni. Mahse sorkarin ruahmanna a siam chin pawn lam thlengin rangkachak, lunghlu leh thir dang zawnna khur, dan phal loh tam tak siam a ni. Heng rangkachak khurte hi dan phal loha laih ni mah se hna a awm reng avangin Venezuela mipui tam tak chuan hrehawm tak chung pawhin an thawk duh a ni.