Valencia-a building kangah mi 15 chin hriat lohin awm

Spain khawpui Valencia-a apartment building lian tak chu nasa takin a kang a, hriat chinah mi pali thi tawhin, mi 14-in hliam an tuar niin thuneitute chuan an sawi.

Building kangah hian chin hriat lohin mi 15 an awm mek bawk niin Valencia Mayor, María José Catalá chuan a tarlang.

Valencia-a apartment building kang hi chhawng 14 niin, mi 450 vel an cheng nia hriat a ni. Building kang hian a bul hnaia building a kang kai bawk a ni. Kangmei chhuah chhan hi hriat la ni lo mah se, kangmei a zual zel chhan hi building sak nana hman hmanrua kang duh tak vang nia an rin thu an sawi.

Chhanchhuah hna hi thawh mek a la ni a, kangmei hi tun dinhmunah ṭhelh mih a la ni lo. Spain Prime Minister, Pedro Sanchez chuan Valencia-a kangmei tuarte chu a tawrhpui thu leh, chhanchhuah hna thawktute chu a theihnghilh loh tur thu a sawi. Valencia-a thuneitute chuan nimin khan sorkar hna zawng zawng chawlin, kangmei tuarte tawrhpuina lantir hun atan an hmang.