Gulf of Aden-ah bungraw phur lawng beih a ni

United Kingdom Maritime Trade Operations center chuan Eilat lawng chawlhmun bulah missile pahnih hmangin lawng kah a nih thu an sawi a, beihna tawk lawngte hi an kang nasa hle a ni. February ni 22-a Gulf of Aden-a thil thleng hi eng helpawl mahin an tih niin la chhal lo mah se, Houthi helpawl tih a nih ngei ring an tam hle. Lawng beih tawk hi Thailand aṭanga lo kal niin Egypt lam pan tur a ni.

Eilat khaw bulah tho hian Ningani zing kar khan missile dang kah chhuah leh ni mah se, Israel Arrow missile defense system chuan lo hre fuh hmanin, boruaka missile awm lai chu a tum a fuh hmain a tichhe hman a ni. Israel lam hian tute kah chhuah nge tih leh, khawi lam aṭanga kah chhuah nge a ni tih chu an sawi lang lo thung. Houthi helpawl chuan heng beihna pahnih hi an tih a nih thu an la sawi lo a ni.

November 2023 aṭang khan Houthi helpawl hian Red Sea leh a chhehvel tuipuia lawng veivak chu an bei ṭhin a, hei hi Israel-in Gaza a beih dodalna lantir nana ti an nih thu an sawi. Helpawl chetna avang hian tuipuia insumdawn tawnna kawng pawimawh tak hi a ralmuang lo hle a, Asia, Middle-East leh Europe insumdawn tawnna pawhin a tawrh phah hle a ni. US chuan thla hmasa aṭang khan boruak aṭangin Houthi helte hi bei ṭhin mah se, awmzia vak a nei thei rih lo a ni.