G7 ramte'n Ukraine an thlawp thu puang

G7 ram hruaitute chuan Russia-in Ukraine runa indona a chhuah cham vawi hnihna pualin, Inrinni khan video conference kaltlangin Ukraine president, Volodymyr Zelensky hun an hmanpui. Ukraine leh Russia indo mek karah Ukraine lam ṭanga thlawp tlat turin an intiam.

G7 ram hruaitute chuan,"Ukraine-in Russia beihna avanga indo kum thumna a thlen hian Ukraine sorkar leh Ukraine mipuite hi G7 ramte hian kan thlawp chhunzawm zel dawn tih hi hria se, ṭanpui an ṭul chuan kan ṭanpui zel dawn a ni," tiin an sawi. G7 ramte hian Ukraine hi ralthuam leh sum fai hmangin an ṭanpui reng a, a theih anga Russia hrek chhunzawm pawh an tum thu an tarlang bawk. Zelensky pawhin Ukraine venghim tur leh sipaite tha tichak tura G7 ramte chungah a innghah thu a sawi ve bawk.

Ukraine leh Russia indo kum hnihna cham pual hian G7 ram zinga mi Italy Prime Minister, Giorgia Meloni leh Canada Prime Minister, Justin Trudeau te chu Ukraine khawpui, Kyiv-ah Inrinni khan an zin a, Ukraine ṭanpuina tur leh thil chi hrang hrangah ruahmanna leh inremna an ziak a ni. Hetih lai hian US President, Joe Biden-a'n Ukraine ṭanpuina tura USD 62 billion pek a tum chu Congress-ah Republican lamin an la dang rih. G7 ramte hi khawvela democracy ram hmasawn tawh leh hausa te intel khawm niin, European Union (EU) bakah US, Canada, Germany, Japan, France, Italy leh UK te an tel a ni.