Donald Trump-a'n Carolina-ah Nikki Haley a hneh

Donald Trump chuan US President thlanna neih tura Republican presidential candidate nih a tumna a sawh nghet zel. Inrinni liam ta khan South Carolina primary-ah Nikki Haley lakah hnehna sang tak a chang leh a, Joe Biden nena President nihna inchuh turin dinhmun ṭha takah a ding tawh.

Trump hian tun hnaia Republican party aṭanga President candidate chuhna inthlan ṭum liah hnehna a chang vek a, state 15-a inthlan awm leh tur atan a dinhmun a ṭhat phah hle a ni. Trump-a khingpui ber Nikki Haley chuan an party-in Trump an vawrh chhuak leh a nih chuan buaina nasa tak a thlen a hlauh thu a sawi bakah President hlui chu rilru lamah a inpeih tawk lo tiin bei mah se, Republican tam tak ngaihdan a sawh sawn pha lo a ni. Trump-a'n Haley a hnehna zat tak hi sawi chian la ni lo mah se, vote thlak theih hun a zawh khan a chak tur a chiang tawh niin thuthar thehdarhtute chuan an sawi.

Nikki Haley hi kum 2010 chho a South Carolina governor langsar tak a ni a, hmeichhe zinga Republican party hminga President inthlan chuh tum ngam awmchhun a ni. An state chhungah Donald Trump hi hneh a, inthlan dang lo awm turah Republican President candidate nih a inbeisei viau laiin a tum angin thil a thleng ta lo a ni. Trump hian thubuai tam tak nei mah se, a au hla 'America first' chu a la ṭhatpui hle tih a hriat. Trump hian Iowa-ah point 30 leh New Hampshire-ah point 10-in hnehna a chang a, Nevada-ah chuhtu awm loin hnehna a chang bawk.