US-in Houthi drone pathum an kap thla

US military chuan Red Sea-a sumdawng lawng liante beih nana Houthi-te'n an hman, drone pathum an kah thlak thu leh, khawmual aṭanga lawng kah chhiat nana hman theih 'anti-ship cruise missile' pasarih an kah chhiat thu an sawi.

US military Central Command (CENTCOM) chuan Houthi drone pathum an kah thlak thu hi puangin, sumdawng lawng engmah a chhiat loh thu an tarlang a, sumdawng lawng beih nan hman tum ni ngeia lang, khawmuala an bun, anti ship cruise missile pasarih an kap chhe bawk tih an tarlang a ni. "CENTCOM sipaite chuan Houthi thunun chin Yemen-ah missile hi hmuin, red sea-a sumdawng lawngte tan leh US Navy tan pawha hlauhawm thei nia an hriat avangin an kap ta ni," an ti.

Iran-in a thlawp, Houthi helpawlte hian Israel-in Gaza a beih duh lohna lantir nan leh beih let ve nan Red Sea-ah hian nikum November thla aṭang khan sumdawng lawng eng emaw zat an bei tawh a ni. Red Sea paltlanga khawvel insumdawn tawnna lawng kalte lo dan chah leh ram liante sum leh pai che vel lo tihbuai chu an tum ber a ni.