March 2-ah Pakistan sorkar thar a pian beisei a ni

Pakistan Muslim League-Nawaz (PML-N) leh Pakistan Peoples Party (PPP)-te'n ṭangrual sorkar siam tura an inrem hnuah, March 2 hian sorkar thar lak luh theih an inbeisei. March 9 hmain President inthlan buatsaih hman an inbeisei bawk.

February 8-a Pakistan-in an ram inthlanpui an neihah khan party mala sorkarna siam thei an awm lo a, mahse, Bilawal Bhutto-Zardari kaihhruai, PPP chuan ṭum thum prime minister lo ni tawh, Nawaz Sharif kaihhruai PML-N hi thlawpin, sorkar thar an siam dawn ta a ni. Parliament member atana thlan tharte hi February 29 hian rinawmna thu tiamtira lak luh an ni dawn a, March 2-ah sorkar thar hi lak luh hman tum a ni. President ni lai Dr. Arif Alvi chuan nikum September thla khan kum 5 term hmang zo tawh mah se, President nihna hi a la chelh chhunzawm reng a ni.