Inkahhai puanin Rafah beih hun a tikhawtlai thei: Netanyahu
Israel prime minister Benjamin Netanyahu chuan Israel leh Hamas-te'n kar khat chhung inkahhai an puan chuan, Gaza Strip chhim lama khaw tawp ber Rafah an beih tur a tihkhawtlai thei thu a sawi.
Netanyahu chuan kar khat chhung beihpui an thlak leh a nih chuan Gaza huamchhungah hnehna pumhlum an chang thei dawn niin a sawi bawk.
Israel PM hian inkahhai puang turin inbiakna an neih mek thu a sawi a, Pathianni aṭang khan Qatar-ah inbiakna hi an chhunzawm tih hriat a ni. Egypt thuneitu lam chuan Qatar hnuah hian Egypt khawpui Cairo-ah Israel nena inbiakna hi an nei leh dawn nia sawi a ni a, hetah hian Hamas mi hren mek chhuah zalen chungchang leh inkahhai chungchangte an sawiho ang.
Egypt hian Hamas leh Israel inkarah hian palai hna a thawk reng a, inkahhai puan a nih theih nana thuthlung an siam chhinah Hamas hren mi 40, hmeichhia leh tar lamte, Israel jail-a tang mek, Palestinian 300 nen inthleng tura rawtna siam a nih thu Egypt hotu pakhat chuan a sawi. Hemi bakah hian inkahhai chu kar ruk chhung puan a nih theih nan inremna siam tum a ni bawk a, an hmalakna a hlawhtling thei a nih chuan mamawh phur lirtheite chuan Gaza-ah chhawmdawlna thil chi hrang hrang an phur lut thei dawn a ni.
Hamas lam hian Israel-in a beihna a tihtawp a, a sipai a koh kir hma loh chuan Israel mi an hrenbeh mekte chu an zavaia chhuah an tum loh thu an sawi a, Palestinian mi Israel tanin a tang mekte chu chhuah vek an phut bawk.
Benjamin Netanyahu chuan Gaza-Egypt ramri bula awm Rafah beih dan tur chungchang chu a cabinet-te nen an sawiho dawn tih a sawi. Rafah beih a nih theih nan hian Cabinet pawmpuina a lak tur thu leh, Gaza-a civil mi la awm chu lak chhuah an nih dawn thu a sawi bawk. Israel PM hian Hamas sipai battalion ruk la awm zinga battalion pali laiin Rafah-ah hian awmhmun an khuar niin a sawi. "Rafah beih a nih hnuah chuan, nasa taka inbeihna hian kar khat aia tam a mamawh tawh lo ang. Inremna kan nei thei lo a nih chuan kan bei ngei ngei ang" Netanyahu chuan a ti.