Ukraine thlawp nan Europe ram hrang hrangah kawng an zawh

Russia-in Ukraine a run avanga Russia leh Ukraine indonain kum hnih a tlin champha pualin, kar liam ta Inrinni khan Europe-a khawpui hrang hrangah kawng zawh a ni.

Europe-a ram hrang hrang khawpuiahte chuan mipui sang chuang pung khawmin, kawng zawhnaah hian Ukraine flag-te an keng hlawm a, Russia chet dan duh lohna lantirna leh Ukraine thlawpna thuziakte an keng hlawm bawk a ni. Germany khawpui, Berlin-a kawng zawhnaah chuan mi 3,000 chuang an kal khawm nia tarlan a ni a, UK khawpui, London-ah chuan kawng zawh hi Mayfair-a Ukrainian Catholic Cathedral-ah sakhaw hrang hrangte'n ṭawngṭai rualna neiin hun an hmang a ni.

Ukraine thlawpna leh sipai thite tawrhpuina lantir a, Russia chet dan demna kawng zawh hi Europe ram khawpui hrang hrang, Belgrade, Bucharest, Istanbul, Paris, Helsinki leh Pamplona-ah te pawh neih a ni. Dublin-a kawng zawhnaah, Irish deputy prime minister, Michael Martin chuan, Ukraine-in ni 730 chhung hrehawmna leh tihduhdahna a tawrh tawh thu leh, Russia rorelna ṭha lo tak avanga in leh chenna chhiain mi tam tak tana harsatna a thlen thu a sawi bawk.