Israel-in Ramadan laiin indo chawlh lailawk an remti : Biden

United States President Joe Biden chuan Hamas-te'n Israel mi an hren mek ṭhenkhatte chu an chhuah zalen a nih chuan Muslim chaw nghei thla, Ramadan laiin Israel chuan Gaza a beihna chu chawlh lailawk a remtih thu a sawi. Biden chuan March 4 hmain inkahhai puan a nih theih nan Israel leh Hamas-te chuan inremna an siam hman a beisei bawk.

Biden chuan,"Ramadan a nih dawn avangin Israel lam hian indo tihtawp lailawk an remtih ngei ka beisei a, chumi chhung chuan hren ni mekte chhanchhuah hna kan thawk thei dawn a ni" a ti. Israel leh Hamas hian inrem lailawkna an neih chhung hian Hamas mi hren mekte chhuah an nih theih nan inbiakna an neih zui beisei a ni.

Israel lam hian US President thusawi ang hian an awm dawn em tih an la sawi chiang lo thung a, mahse, inkahhai puan a nih theih nan erawh inbiakna neih mek a ni a, hetah hian an mi hren inthleng tawnna tura inremna neih pawh sawiho a ni bawk. March ni 10 aṭangin Ramadan hi Muslim-te'n an hmang ṭan dawn a, hemi hma hian inremna siam hman hi a ngai dawn a ni.

Israel hian inremna an siam theih loh chuan kar leh chhoah Rafah-ah beihpui thlak an tum tih an lo sawi tawh. Prime minister Benjamin Netanyahu chuan cabinet pawmpuina la turin ṭhut khawm a ko dawn a ni. Rafah-ah hian Palestinian mtd. 1.4 chuang an awm avangin Israel-in Rafah beih a tumna hian khawvel ram hrang hrang a ti ralkhel hle a, nunna tam tak chan an awm leh dawn avangin Israel chuan a thiltum a ṭhulh leh theih nan inremna siam turin ngenna a dawng nasa hle.