SKorea sorkarin doctor nuarte an hnaa let turin hriatttir

South Korea doctor-te chuan hlawh pun leh an hnathawh dan phung siam ṭhat phut leh, sorkarin doctor zir thei zat tihpun a rel duh lohna lantir nan an hna aṭanga chawlin nawrh an huaihawt mek a, hetih lai hian sorkar chuan an hnaa let vek tur leh, hun tiam chhunga let lote chu hrem an nih tur thu a puang.

Sorkarin doctor zir tur lak zat tihpun tuma ruahmanna a siam avangin, South Korea-a doctor leh medical intern 9,000 vel chuan kar hmasa aṭang khan an hna chawlin nawrh an huaihawt a, hei vang hian damlo inenkawl mek tam takin an tawrh phah a ni. Hemi chungchangah hian South Korea vice health minister, Park Min-soo chuan doctor nuar mekte chu February thla ral hmaa an hnaa an let lo a nih chuan an medical license thla thum chhung suspend a nih tur thu a sawi. Hei bakah dan anga hremna an hmachhawn chhunzawm theih tur thu leh, ban hial pawh an tawk thei dawn niin a sawi bawk.

South Korea medical law hnuaiah sorkar hian mipui tana pawi thei a nih chinah chuan doctor leh inenkawlna lam thawktute hi hnaa let turin thu a pe thei a, thupek zawm lote chu medical license tihtawp bakah kum thum jail tan leh won million 30 chawi thlenga hrem theih an ni.

Safety minister, Lee Sang-min chuan damdawi inah damlote an chiai thu leh, emergency hnathawh pawh a buai tawh thu sawiin,"Thil awmdan thlirin sorkar chuan ngenna thuchhuah a siam a, doctor nuar mekte chu February 29 hmaa an hnaa an let leh chuan thil thleng tawh zawng zawng haider a ni ang. In thil duh leh phutte chu damlo enkawla inkhawsakna hmun aṭang hian a ringin a fiah ber a ni," tiin a a sawi zui.

South Korea sorkar hian kum thar aṭang chuan university-te'n medical zirlai an neih theih zat, 3,058 bakah zirlai 2,000 admit belh tura ruahmanna an siam thu sawiin, kum 2035-ah chuan doctor 10,000 chuang neih belh theih beisei a nih thu an tarlang a ni. Sorkar ruahmanna hi duh loin doctor training lai leh intern te chuan sorkar chu doctor lak belh lam ngaihtuah hmasa lo a, a awm sate hlawh tihpun leh hnathawh dan phung ngaihtuah hmasa tura phutin nawrh an huaihawt ta a ni.