Israel - UAE deal duh loin Palestinian-ten kawng zawh

Israel leh United Arab Emirates (UAE) in thawhdunna tura inremna an siam duh loin, Gaza Strip-ah Palestinian-ten kawng an zawh. 

Kawngzawhte hian Israel leh US flag-te an hal a, Israel prime minister Benjamin Netanyahu leh US president Donald Trump thlalakte an sawisa zui bawk. US president Trump hmalaknaa Israel leh UAE-in inremna an siam chu Jerusalem leh Palestinian mite phatsanna a ni, an ti. 

Palestinian Authority president Mah­moud Abbas-an Trump-a Middle Eastplan a hnawl chu lawmawm an nih thu sawiin, Abbas an fak thu an sawi. Gaza Strip-a kawngzawh hi Palestinian pawl, Hamas-te huaihawt a ni. 

Hetih lai hian Israel fighter jet-te chuan a zawna a zan riatna atan Nilaini zan khan Gaza Strip-a Hamas ho hmun an beih chhunzawm leh. Hamas security lam chuan Israel jet leh drone hmangin  Qassam Brigades-a hmun eng emaw zat chu kah a nih thu an sawi. 

Israel hian kar liam ta khan Gaza aṭanga balloon alh an thlawh chhuah tir hmanga an rama kangmei a chhuah fo avangin Gaza Strip-a fuel lakluh a lo khap tawh a, hei bakah hian Gaza-a sangha mantuten tuipuia sangha an man a khap zui bawk. 

Fuel lakluh khap a nih avang hian Thawhlehni aṭang khan Gaza-a power plant awmchhun chu khar a ngaih phah a ni. Fuel indaih lohna a nasat tawh vangin ni khatah power supply hi darkar li chhung chauh pek chhuah a ni rih ang. 

Pakistan prime minister Imran Khan chuan Palestinian-te dikna leh independent state pek an nih hma loh chuan Israel ram chu a pawm theih dawn loh thu Dunya TV-a interview a neihnaah a sawi.

Khan chuan engti kawng zawng mahin Israel chu an ramin thawhpui a tum loh thu a sawi  a, Israel chu kan pawm thei a nih chuan Israel rama Palestinian-te tihduhdah an nih chu kan hai der lui tihna a ni ang, a ti a, Israel chu Israel mite rama kan pawm dawn chuan Kashmir-a kan ram hmalakna hi kan tihtawp zui ve a ngai dawn a, mahse Kashmir-a kan mi leh sa tihduhdah tawkte kan ensan ve thei lo, tiin Khan chuan a sawi bawk. 

Hemi chungchang hi Khan hian a sawi chhuah chhan hi United Arab Emirates (UAE) leh Israel ten inremna an siam vang a ni. Pakistan chuan Palestinian-te tiduhdah reng ṭhin tu Isreal-te chu a thawhpui theih loh tur thu hi Khan chuan a sawi a ni.

Pakistan mi leh sate chu ram hrang hranga zin phalsak an ni a, mahse Israel ramah hi chuan zin phalsak an ni lo. Khan chuan "Ka chhia leh ṭha hriatna thiang tak mai hian Israel chu Israel mite ram a ni tih a pawm ve theih loh thu min hrilh a, a pawm theih loh chhan hi he rama Palestinian miten tihduhdah an tuar vang a ni," a ti.

Arab rama zingah hian Egypt leh Jordan-te chuan Israel chu Israel mite ramah an pawm fel tawh a, tun hnai khan UAE chuan a pawm ve leh a, gulf Arab ram zinga pawm hmasa ber a ni.