Mali ram dinhmun thli-thlai zui reng : UN

United Nations secretary general Antonio Guterres chuan Mali ram dinhmun chu a thlithlai zui reng a ni tih a thupuangtu chuan a sawi. 

Mali sipaite chuan an ram president Ibrahim Boubacar Keita leh a cabinet minister ṭhenkhat manin an hreng zui a, man a nih hnuah Keita hian President a nihna aṭanga a ban thu a puang bawk. 

President man a ni leh, bang tura nawr luih a nih chu ram hrang hrangte bakah UN ngei pawhin an dem thu an lo sawi tawh a, an mi mante chhuah thuai tur leh boruak ṭha siam turin sipaite hi an phut. 

Hetih lai hian sipaite chuan ram dinhmun chhe lehzual a tlulut tur venna atan President hi an man niin an sawi a, civil sorkar din a ni dawn a, inthlan pawh buatsaih thuai a nih tur thu an sawi. 

Mali hi khawvela ram rethei ber zingah a tel a, tualchhung buaina bakah firfiakten nena inbeihna an tawk fo a ni. Keita hi kum 2018 khan a president term hnihna atan thlan tlin a ni a, mahse kumin June thla aṭang khan sorkara eirukna hluar vang leh, an ram economy enkawl thiam loa puhin mipuiten nawrh an huaihawt fo a ni. Sipai zinga eng emaw zat pawh an hlawh chungchang leh, firfiakten nena inbeihna an tawh fo avangin sorkar lakah hian an lungawi lo bawk a ni.