Covid-19 kaihhnawih pawi-khawihna 600 chuang report

International Commi­ttee of the Red Cross (ICRC) chuan khawvela hripui leng mek, Covid-19  kaihhnawiha pawikhawih­na thleng report 600 chuang an dawng tawh tih a sawi. 

ICRC chuan pawi­khawihna thleng hrang hrang report 611 an dawn thu leh, hengte hi kumin February - July thla inkara ram 40 chuang aṭanga an dawn tih a tarlang. Heng report an dawn zingah 20% chu kut inthlakna, 15% chu ṭawngkama indeusawh leh invauna niin 15% chu hri leng kaihhnawiha inthliarhranna lam hawite a ni tih an tarlang. 

He hripui leng hian mipuiten kan mamawh zual ber, healthcare worker-te dinhmun chu him lo taka dahin, beih leh thinhrik tawk pawh an awm fo nia sawi a ni. Healthcare worker, hri kai leh medical infrastructure-te beih an nih ṭhinna chhan hi hri kai hlauh vang te, hri kai thihna thleng vanga lungawi lohna te, hri kaite ṭha taka phum leh vui an nih theih loh avanga thinrimna vangte a ni fo tih ICRC chuan a sawi bawk. 

Hetianga Covid-19 kaih­­hnawihna pawi­khawih­na thlen tamna ram chu Afghanistan, Phili­ppines leh Colombia a nih thu a sawi bawk.