Ṭhalai zingah Myanmar chhuahsan tum an pung; Passport office bula innekbuainaah mi 2 an thi

Myanmar sipai sorkarin an ram ṭhalaite kum hnih chhung sipaia ṭan ngei ngeina tur dan thar a tihnun leh hnuah, ṭhalai tam tak chuan sipaia ṭan luihtir hlauin an ram chhuahsan an tum.

Sipai sorkarin April thla laihawl aṭangin sipai ṭanna, mandatory conscription law hi hman ṭan a ni dawn tih a puan avangin, ṭhalaite chuan ram danga kal chhuah tumin passport office leh embassy-ahte dilna an theh lut nasa a, ni tin mi tam tak intlar ṭhinin, passport office kawta kal khawmte innekbuaina thlengah mi pahnih an thi tawh bawk a ni.

Kum 2010 khan sipai sorkar hmasa chuan People's Military Service Law hi siamin, he dan hnuaiah hian mipa chu kum 18-35 inkar leh, hmeichhia kum 18-27 inkarah kum hnih chhung sipaiah an ṭan ngei ngei a ngai a, ramin a mamawh dan a zirin sipai an ṭan hun hi kum nga thleng pawhsei theih a ni. Medical doctor, engineer leh professional group dangte tan sipaia an ṭan theih hun hi hmeichhia kum 35 leh, mipa kum 45 thlengin pawhsei sak an ni bawk.

Sipai sorkar hmasa khan he dan hi siam mah se, a takin a kalpui lo a, mahse, tuna sipai sorkar lai mek hian rawn tinung thar lehin, a taka hman a tum a ni. A thuchhuah thar berah, sipaia ṭang tur hian hmeichhia erawh lak tel an ni rih dawn lo tih a sawi ṭha leh a, heti chung hian hmeichhe ṭhalai tam tak chuan an ram chhuahsan hi an tum tho a ni.

Sorkar thupuangtu chuan April thla laihawla Burmese New Year, Thingyan festival hman zawhah sipaia ṭang turte hi lak ṭan an ni tawh dawn a, a thawh khatnaah mi 5,000 lak phawt a ni dawn tih a sawi. Hemi hma ngeia an ram chhuahsan hman tum ṭhalai tam tak an awm a, a tam zawk chuan Thailand leh Singapore pan an tum a, Europe ram lama kal tum pawh eng emaw zat an awm bawk.