Pakistan court-in Imran Khan leh a nupui eiruk thubuaia inhnamhnawihah puh

Thubuai eng emaw zat a neih avanga tan ina awm mek, Pakistan prime minister hlui, Imran Khan leh a nupui, Bushra Bibi chu Pakistan accountability court chuan Al Qadir eiruk thubuai an tih, pound million 190 zet chingpennaa inhnamhnawihah a puh.

He thubuai hi Rawalpindi-a Adiala jail-ah Judge Nasir Javed Rana chuan a ngaihtuah a, Imran Khan leh a nupui inhnamhnawiha court-in a puhna eiruk thubuai hi UK National Crime Agency-in Pakistan mi, bungraw hmanga sumdawng, Malik Riaz Hussain-a'n sum a tihchingpen an man, pound million 190 zet, Al-Qadir trust hnena a thawn leh tihchingpen chungchang a ni. He thubuai avang hian May 2023 khan Imran Khan hi man a lo ni tawh a, he thubuai kaihhnawihah vek hian December thla khan National Accountability Bureau (NAB) chuan Imran Khan leh a nupui bakah, mi eng emaw zat an lo chhui chiang tawh bawk a ni. Hetih lai hian Imran Khan leh a nupui hian court-in a puhna hi an pha thung.

Imran Khan leh a nupui hian thubuai dang eng emaw zat neiin kum 14 tang tura hrem an ni a, Imran Khan hi Adiala tan inah dah niin, a nupui Bushra Bibi hi Islamabad-a Imran khan-a Bani Gala inah tantir a ni thung.