Nau piang zat an tlem zel avangin Japan an buai

Kum 2023 khan Japan chuan nau piang 7,58,631 an nei a, hei hi kum hmasa lam aiin 5.1%-in a tlem zawk. Kum 1899-a Japan-a nau piang zat chhinchhiah ṭan a nih hnu lamah kum khat chhunga Japan-a nau piang an tlem ber kum a ni.

Sorkar data chuan nikum khan a zawna kum riatna atan Japan-a nau piang zat an tlakhniam thu a tarlang. Japan ramah hian innei zat pawh an tlahniam chak hle a, kum 90 chhunga a vawi khatna atan innei zat hi maktaduai chanve hnuai lamah a tla thla a ni, hei hi nau piang zat tlakhniam chhan lian tak pakhat a ni. Zir chiannain a tarlan dan chuan Japan ramchhung ṭhalai tam zawk chuan inneih a, chhungkaw din chu an zuam lo niin an tarlang. Inneih an zuam loh chhan an tarlante chu hna vang lutuk, khawsak man sang chak lutuk leh nau pawm an peih loh hrim hrim vangte an ni.

Chief Cabinet Secretary Yoshimasa Hayashi chuan nau piang zat an tlem zel chu 'harsatna lian tak' niin a sawi a,"Kum ruk lo awm tur emaw kum 2030-ah emaw chuan tuna kum naupang zawkte hian upat lam an lo pan leh tawh ang a, chumi hma ngei chu nau piang zat tihpun lehna tur a hun pawimawh tak a ni dawn. Hun kan khawhral thiang lo," a ti. Japan Prime Minister Fumio Kishida chuan nau piang an pun theih nan ṭanpuina pek bakah naupang leh nu leh pa tan hamṭhatna dawn theihna turte an siam dawn tih a sawi.

Nau piang zat tlahniam hi tunhnai thil mai a ni lo a, kum 50 liam ta aṭanga Japan buaina a ni tawh. Tun anga nau piang zat an tlahniam zel a nih chuan, tuna Japan ram mipui mtd 125 hi kum 2070-ah mtd 87 a tlahniam tur leh, chutah chuan mi 10 zinga mi pali zel chu kum 65 chung lam ni tura chhut a ni. Hetianga mihring tlem leh kum upa tamna ram tan chuan hmasawnna kawng zawh a harsat bakah ram venhimna kawngah an chak ṭha thei lo a ni.