US-in Iraq leh ramchhunga raltlante ṭanpui dawn

United States (US) chuan Nilaini khan US dollar maktaduai 204 chu US huma­nitarian response kal­tlangin Iraq-a raltlante tan ṭanpuina atan a pek dawn thu a sawi.

He ṭanpuina hi raltlan chenna in nei loten chenna an neih theih nan te, healthcare atan te, chaw an tlakchham tur ven nan te, tui leh sanitation atan te hman a ni ang. Heng bakah hian raltlante tana zirna pek a nih theihna tura ruahman a ni bawk a, raltlanten nun nuam zawk an hman theih nana tih a ni bawk. 

Ṭanpuina pawisa US-in a pek tum zinga US dollar mtd 133 chu State Department-a Bureau of Population, Refu­gees, and Migration aṭangin a ni a, a dang US dollar mtd 71 hi USAID-a Bureau for Huma­nitarian Assistance aṭanga pawisa thawh a ni thung. Ṭanpuina an pek tur nen hian financial year 2019 aṭanga chhiarin, US humanitarian response kaltanga Iraq-a ṭan­puina US-in a pek hi US dollar mtd 706 chuang a ni tawh. 

US-in Iraq hi ṭanpui a tumna kawngah hian US Secretary Mike Pompeo chuan Iraq Iraqi Foreign Minister Fuad Hussein chu a hmu tawh a, Pompeo chuan Iraq-a Christian, Yezidis leh Shabak-te chu hnuaichhiahna an tawh ṭhin avangin US chuan an ngaihsak bik thu a sawi.

"US chuan Iraq rama security force-te thuam chak a nih theih nan a ṭanpui zel dawn a, US bakah hian NATO leh khawvel ramdang ten Iraq-a ISIS-te hneh an nih theih nan Iraq kan ṭanpui zel dawn a ni," tiin Pompeo chuan a sawi bawk.

Iraq-a Covid-19 dona atan US chuan dollar mtd 49.5 a pe tawh a, hei bakah hian financial year kal mek atan US dollar mtd 22.7 chu Iraq-a Syria raltlan mi 2,44,000 chuangte tan a pe tawh bawk a ni.