Wuhan-a pool party-in sawi zui a hlawh

Covid-19 leng vanga ram hrang hrangte inkhar­khip a, hri darh tur venna atana mipuite tana khuah­khirhna hrang hrang an siam laiin, he hri hmuh chhuah ṭanna China-a Wuhan khawpuiah chuan August 15 khan pool party buatsaihin tel an ṭhahnem hle. Mahse hei hian ram hrang hrangah sawizui leh sawisel a hlawh zui hle a ni. 

Wuhan Maya Beach Water Park-a pool party buatsaihah hian mi sang tel chu hmai tuamna pawh hmang loin an awmkhawm a ni. Social media lamah sawisel an hlawh zui hle a, China thuneitute thlenga demna thute pawh a tam hle a ni. Hetih lai hian a ṭantu  lam chuan Covid-19 doletna kawnga khauh taka an hmalakna rah an seng ta niin an sawi ve thung. Mi maktaduai 11 chen­na, Wuhan khawpuiah hian hri leng vangin kumin January 23 khan inkharkhipna khauh tak puan a ni a, ni 76 chhung kalpui a nih hnuah April thla khan  hlih a ni. Mahse a hnu thla lawkah hri kai hmuh leh an nih avangin khawpui hmun ṭhenkhat chu kharkhip chhunzawm leh a ni a, hri darh tur venna atan khawpuia chengte zawng zawng test runpui neih zui a ni bawk. 

May thla laihawl aṭangin tualchhungah hri kai hmuh an awm tawh loh avangin June thla aṭang khan khuahkhirhnate thlahdul chhoh niin, pung­khawm khap a nih tawh lo bawk. July thlaah chuan nunphung a pangngai chho ṭan tawh a ni.