Taiwan sorkar email account China-in hack sak

Taiwan Investigation Bureau-a Cyber Security Inves­tigation Office chuan Taiwan sorkar agency 10-a email account 6,000 vel chu China-in a hack sak niin Nilaini khan a tarlang.

Heng email-te hack a nih chhan hi data (information) pawi­mawh China hian hriat ruk a tum vang nia sawi a ni. Kum 2016-a Taiwan president atan Tsai Ing-wen thlan a nih khan China chuan cyber campaign a nei ṭan a, mahse an campaign dan erawh a thup tlat thung. Tsai hi kumin January khan President atan thlan nawn leh a ni a, China cyber campaign hi chunzawm leh a ni bawk. 

Taiwan sorkar-a email account 6,000 vel hack tute hi Taiwan Investigation Bureau-a Cyber Security Investigation Office chuan Chinese hacking group Blacktech leh Taidoor an nih thu a tarlang. He group pahnih hian kum 2018 aṭang khan Taiwan sorkar department leh information chu hriat ruk an tum niin Taiwan Investigation Office chuan a tarlang bawk.

Cyber Security Investigation Office-a deputy director, Liu Chia-zung chuan email account 6,000 vel hack a nih rual hian heng account-te hi tihchhiat a nih thu a sawi a, "Heng kan thil tawnte mipuite hnena kan sawi chhuah chhan chu midangin fimkhur nan an lo hman theih nan a ni," a ti.

US health secretary Alex Azar chuan tun hnai khan Taiwan chu mahnia thu nei thliarkar ram a nih thu a sawi a, Covid-19 dona kawngah US chuan Taiwan hi a pui bawk a ni. Tun hma aṭangin China hian Taiwan hi a ram bial pakhatah a chhal avangin US hmalakna avang hian China chu a lawm lo hle a, Taiwan bul hnaih tuipuiah sipai a dah belh nual nia sawi a ni.