ISIS ten sum fai $ maktaduai 150-200 nei
UN a Russia ambassador Vitaly Churkin chuan ISIS firfiak ten sum fai dollar maktaduai 150-200 an nei tih a sawi. ISIS te hian hman lai thil hlu, vang tawh tak tak an hralhna aṭangin hetiang sum zozai hi an hmu-chhuak thei a ni.
Khawvel huapa thil hlu vawn ṭhat pawimawh 1,00,000 leh khaw hlui laichhuah 4,500 zet bakah UNESCO in World Heritage List a puan zinga tel pha pakua zet an thunun mek a. Heng zinga thilhlu dahsawn theih chu a rukin sumah an chan tir zel a, kum tin dollar maktaduai 150 aṭanga 200 inkar man hu an hralhchhuak ṭhin niin Vitaly Churkin chuan UN hnenah ziakin a thlen.
ISIS zingah pawh hian hetiang thil hlu hralh chhuak thei Islamic State antiquities division an awm a; an ni chauh hian thil hlu tak tak lak chhuah, dahsawn leh hralh thlengin thuneihna a nei a ni.
Thuthar thehdarhtute chuan ISIS ten thil hlui leh hmunhlui an tihchhiat thlalak an tidarh tawh
ṭhin. Russia palai chuan hetianga ISIS ten thil hlui an hralhru reng thei chu Turkey sorkar vang nia sawiin, Turkey hian ISIS hnen aṭangin oil an lei ṭhin niin a sawi bawk. Turkey ram kaltlangin firfiakte hian an hralh chhuak nasa hle a, Gaziantep khawpuiah hmanlai thil hlu hi a rukin an hralh ṭhin.
Tlereuh, pawisa hlui leh rallak sum ang chi tenau deuh chu Izmir khawpuiah te, Mersin leh Antalya khawpuiah kengin, misual rual nen inthurualin hralh a ni ṭhin.
Tunhnaiah ISIS firfiakte hian social media hman ṭangkai dan an hre thar a, thil hlute hi midang kal-tlang loin online hmangin, a lei duhtute nen an indawr thei ta ṭhin a ni.
Internet-a thil zawrhna hmunpui eBay chuan dan phalloh thil zuar an hriatpui loh thu an sawi thung a, ISIS hoin a ruka an hralh ṭhin nia sawi pawh an hriatpui lo tih an sawi.
Hetih lai hian ISIS firfiakte hian naupang lamah bu khuar tumin theihtawp an chhuah mek a. Sikulah pawh zirna lam kalpui loin insual te an zirtir bakah, rahpuah bomb kam dante an zirtir a ni. Bomb siam dan pawh an zir nasa hle tih hriat a ni. He thu hi Iraq aṭanga Ramadi a raltlan tleirawl kum12 a upa chuan Human Rights Watch (HRW) palai hnenah a sawi.
US thlawp Iraqi sipaite chuan ISIS hi February thla khan Ramadi aṭangin an nawrchhuak tawh; amaherawh chu chhungkaw tam tak chu khawpui rauhsan ah hian an la cheng a ni.