Mossack Fonseca boruak kal zel

Panama law firm, Mossack Fonseca-a tax document maktaduai 11.5 zet put ru-ah chhiah awl tuma rampawn lama sum chheprelhtu zinga hming lan vanga bangta Iceland Prime Minister Sigmundur David Gunnlaugsson thlak turin Sigurdur Ingi Johannsson an ruat. Johannsson hi Agriculture and fisheries minister ni lai a ni.

Mosscak Fonseca document putru-ah anmahni dawrtu mi tam tak hming langin, ram hruaitu leh politician langsar tak takte hming pawh a lang tel a ni.

Panama rama law firm Mossack Fonseca lehkha pawimawhte a darh tak hian khawvel hmun hrang hranga hausa leh thil tithei, ram hruaitu leh milar ten sum an chhehrelh dan a tarlang chiang hle. Panama ram hi chhiah awlruk duhte tan chuan vanram tenau a ni ber mai. Kum 1919 aṭang tawh khan chhiah awlruk duh sumdawng lian, milar, politician leh ram hruaituten an pan ṭhin.

Lehkha pawimawh putru aṭanga a lan danin India mi tam tak chuan he hmunah hian sum an chheprelh ngei niin a lang. Chung zingah chuan Padma Bhushan dawngtu mi hausa tawntaw Kushal Pal Singh te leh Aishwarya Rai, Amitabh Bachchan, Iqbal Mirchi, leh PM Modi-a ṭhian Adani te hming pawh a tel.

Hetih lai hian ram hrang hrang hruaitu leh milar te an hmingchhiat laiin US khua leh tui chu hlin tur an la awm tlat lo a, hei hi mi tam tak mak tih a ni. China Communist Party a hruaitu lawk tak tak chhungkhatte hming pariat, China President Xi Jinping-a makpa telin a lang bawk.