Brussels-a bomb tipuaktu EU hnathawk

March ni 22 a Belgium khawpui, Brussels a thihchilh bomb tipuaktu pakhat kha kum nga kaltaa European parliament-a tihfai hna thawk ṭhin a nih thu EU chuan an sawi.

European parliament tihfai hna hi kum 2009 leh 2010 khan thla khat chhung ve ve a lo thawk tawh a ni. Thihchilh bomp tipuaktu kha Najim Laachraoui niin, a ṭhianpa Ibrahim El Bakraoui nen Brussels thlawhna ṭum hmunah bomb an tipuak a, Brussels metro station pawh tibuaiin mi 32 zetin nunna an chan phah a ni. Laachraoui hi nikum November thlaa Paris khawpui beihna tura bomb siamtu ber kha niin an hre bawk. Paris beihna ah khan mi 130 in nunna an chan nghe nghe a ni.

European parliament chuan kum 5 kaltaa an chhawr dawn khan sualna lamah tawnhriat a nei lo tih an sawi. Laachraoui hi kum 2013 khan Syria ah a zin nia hriat a ni a, nikum september thla khan Europe ah let lehin Austria-Hungary ramri ah police in an dang a. Lehkha lem siamchawpin Soufiane Kayal angin a lut leh ta tho a, Paris beihna leh Brussels beihna kha a dung nia hriat a ni.