China-in Myanmar nena ramri leh insumdawn tawnna siam ṭhat tum

Myanmar tlawh a zin mek, Chinese foreign minister Wang Yi chuan ramri chungchanga ram pahnihte inhmuhthiam lohna siam ṭhat a tiam. He thu hi Myanmar rama rorelna chelhtu ber NLD hruaitu Aung San Suu Kyi leh sorkar mi pawimawhte nen an sawi ho.

Chinese foreign minister hian Myanmar sorkar chu hydro electricity project an kalpui mek ṭanpui nan US Dollar tluklehdingawn thum leh maktaduai ruk pek a tiam bawk.

"China hi ramri lama muanna leh rorelna nghet a awm theih nan a inring reng a, Myanmar-in a ram hmar lama remna tura inbiak a duh chuan a thlawp reng ang" a ti.

China hian an ram chhung lama loneitute chu Myanmar sipaiten an that niin a zualko bawk. Ramri kana Myanmar thlawhna ten Chinese loneitu pahnih an that chu hriatthiam har an tihthu a thlen a ni. Myanmar rorelna in Naypyitaw chuan hemi thu hi chhangletin, helhoin chet an lak hmasak chhanletnaa thil thleng a nih thu an sawi. He lai ramri hi sipaiho leh helho inbeihna hmun ber a ni a, China sumdawng mi te veivah tamna lai a ni bawk.

Hydro electricity project kalpui tawh Myitsone dam chu Myanmar president kalchhhuakta Thein Sein khan a chawlh tir a. Beijing chuan tharthawh leh a, senso za-a 90 sen a huam tih a sawi. China in sum hmanga puih a tumna pakhat Letpadaung hmuna dar laihchhuahna chu tualchhung miin an dodal nasa hle bawk.

Myanmar president chuan Foreign Minister atana ruat tawh, NLD president Aung San Suu Kyi chu Special Adviser hna a pek belh bawk.