Russia eptu hruaitu Alexei Navalny dinhmun a ṭha lo

Russia eptu hruaitu Alexei Navalny chu tura hrai nia sawi a ni a, a dinhmun a ṭha hlo hle. Nikhaw hreloa awmin,  Siberia damdawi-ina intensive care unit (ICU)-ah ventilator hmanga thawk tir mek a ni.

Kum 44 mi Navalny hi thawlhtheihna a chuannaah zing lamah thingpui a in a, thil dang in a nei lo nia sawi a ni. Hei vang hian amah enkawltu doctor chuan a thingpui inah hian tur a tel nia a rin thu a sawi.

Navalny hi thlawhtheihna a chuan lai hian bathroom lamah kalin inthiar a tum a, mahse nikhaw hre loin a tlu zui nghal a, thlawhtheihna pawh hi emergency-a ṭum tir nghal niin, a theih ang anga bawihsawm a nih hnuah damdawi-in dah nghal a ni. 

Navalny hi Siberia aṭanga Moscow pan tur a ni a, eirukna duh lo pawl zinga mi niin Russia president Vladimir Putin pawh vawi tam a lo sawisel tawh bawk. Nikum khan Anti-corrup­tion campaigner, Navalny hi sorkar laka lungawi lohna lantira rally huaihawt a tum vangin man a lo ni tawh a, rally huaihawt vangin vawi tam tak man a lo tawk tawh bawk a ni. Nikuma man a nih khan a tannaah tur a in vang bawkin damdawi-inah dah luh a ni a, a tanna aṭanga chhuah zalen zui a ni. Tur hi tute pek nge tih hriat a ni lo. 

Navalny hian beih a lo tawk fo tawh a, kum 2017 khan a mit pawh chemical hmangin tih kansak a lo tawk tawh bawk a ni. September thlaa Russia regional inthlan neih tur atan hian Navalny hi a campaign mek a, hei vang hian beih a tawk nia a lan thu media ṭhenkhat chuan an tarlang.