Palestinian tan ṭampui tawrh a hlauhawm : WFP

Israel leh Hamas inbeihna chuan Palestinian mipui tam tak tan tawrhna a thlen belh mek zel. Tun dinhmunah chuan Gaza Strip hmar lamah chuan nitin mamawh phurh luh ngaihna a awm loh avangin World Food Programme (WFP) chuan Gaza hmar lam chuan ṭampui a tawrh mai a hlauhawm thu a sawi.

Indo tihtawp a nih theih nan inremna lailawk neih theih chu beisei a ni a, buaina tam zawk chu a kiam beisei ni mah se chhawmdawl hna thawktute chuan ṭam tlak avangin harsatna a awm dawn niin an sawi thung.

Gaza-a Hamas kaihhruai health ministry chuan February 29 thleng khan indona avang hian mi 30,000 chuangin nunna an chan tawh tih an sawi a, nunna chan hi ṭam tla avangin a la pun belh thei niin an sawi bawk. Health ministry thupuangtu Ashraf al-Qudra chuan ei leh in tlakchham avangin Gaza-a Palestinian naupangte chuan harsatna lian tak an tawk mek a, khawvel ram dangte chu ṭam avanga nunna chan an awm belh loh nana hma la turin an ngen.

Israel leh Hamas-ten inremna an neih theih nana palai hna thawktu, Egypt, Qatar leh US chuan kar ruk chhung inkahhai puan a nih theih nan hma an la mek a ni. Inremna an neih theih chuan chhawmdawl hna thawkten mamawh an phurh luh theih dawn avangin Gaza-a Palestiniante dinhmun pawhin ziaawm lam a pan rin a ni.

Israel-in chhawmdawlna phur motor hualtu mipuite kap

Israel sipaite chuan Gaza City beihna chu an chhunzawm zel a, Ningani zingkar khan Palestinian mipui, chhawmdawlna phurtu motor hual beta pungkhawmte chu kapin, he inkahna avang hian mi 104 chuangin nunna an chan a, mi 700 chuangin hliam an tuar bawk niin Palestinian health ministry chuan an sawi.

Israel lam chuan mipui pungkhawm laka silai hman a nih chhan hi hlauhawm thleng thei laka invenna a nih thu an sawi thung. Israel Army chuan chhawmdawl hna thawktur motor lut chu mipui pungkhawm hian an lo hual beh avanga kap ta an nih thu an sawi a, silai mai bakah hian innek buaina thleng avangin thi leh hliam hi an tam phah a ni, an ti.

Mit ngeia thil thleng hmutute sawidan chuan mi sang chuang pungkhawm chuan eitur phur motor pana an kal laiin silai hmanga beih an nih thu an sawi. Palestinian health ministry chuan thil thleng chu pawi an ti takzet tih sawiin hetiang thil thleng hi insuatna chikhat nia an ngaih thu an sawi.

Gaza-a thil thleng avang hian UN Security Council-ah demna motion chu Algeria-in a put lut a, mahse US-in an thlawp loh avangin motion hi pawm a ni lo. US palai Robert Wood chuan thuchiang engmah a la awm lo a, thil thleng hi chhuichian a la ni mek chauh a ni, a ti. Israel demna motion hi US tih loh UN securtiy council member dang 14 chuan an pawm thung a, mahse veto power nei US-in a pawmloh avangin motion hi pawm theih a ni ta lo a ni.