Bangladesh-a in kangah mi 45 an thi

Bangladesh khawpui, Dhaka-a commercial building, chhawng ruka sangah kangmei a chhuak a, mi 45 an thih bakah hliam tuar eng emaw zat an awm.

Kangmei chhuahna hmun hi Gree Cozy Cottage Shopping Mall a ni a, Ningani zan rei lama chhuak a ni. A chhawng hnuai ber, biryani restaurant aṭanga chhuak niin, kangṭhelhtu pawl 13-ten darkar thum vel an ṭhelh hnuah an ṭhelh mit thei chauh a ni.

Doctor-te chuan thi zinga a tam ber chu meikhu an hip luh nasat vanga thi niin an sawi a, ṭhenkhat chu building aṭanga an zuanthlakna lama thite an ni bawk. Fire department lam hotute chuan kangmei chu gas leak aṭanga chhuak nia a lan thu an sawi.

Prime minister Sheik Hasina chuan vanduaina thleng chu pawi a tih thu leh, thi chhungte leh hliam tuarte a tawrhpui thu a sawi a, hliam tuarte enkawlna ṭha pe thuai turin official-te pawh a hriattir. Sorkar chuan kangmei chhuah dan chhui chiang tur hian member panga awmna panel a din nghal a ni.

Dhaka-a in sak tam tak hian kangmei laka himna tur an ngaih pawimawh tawk loh avangin kangmei nasa tak hi a chhuak fo a, kum 2021 July thla khan Dhaka khaw daia food processing factory-a kangmei chhuakah mi 54 an lo thi tawh bawk.