2023-ah Carbon Dioxide pek chhuah a tam

International Energy Agency (IEA) chuan khawvel pumah kawlphetha pek chhuahna atana fossil fuel hman nasat avangin, kum 2023 chu khawphetha siam chhuah nana carbon dioxide (CO2) pek chhuah tam ber kum a nih thu an sawi.

IEA chuan kum 2022 khan CO2 pek chhuah chu 1.3% a a tlakhniam thu sawiin, hei hi nizung chakna, thli leh electric lirthei hman kawngah hmalakna a awm vang a nih thu an sawi. Mahse khawvel sumdawnnain ziaawm lam a pan leh tak avangin kawlphetha mamawhna a sang chho leh a, chu chuan CO2 pek chhuah chu a ti sang leh ta niin an sawi. Hydropower project tam takah tui a awm ṭhat tawk loh vangin kawlphetha pek chhuah nan fossil fuel hmanga thlak a ni a, hei hian 40% laiin CO2 pek chhuah a tihsan phah tih IEA zirchianna neih chuan a tarlang.

IEA report hian US leh European Union-in kawlphetha neihna atana boruak bawlhhlawh an pek chhuah chu kum hmasa lam aiin a tlem zawk tih an tarlang. Hetih lai hian China-ah erawh chuan 5% laiin a sang zawk thung.

Mithiamte chuan boruak bawlhhlawh pek chhuah hi tih tlem a nih theih nan fossil fuel hman tlem a ngaih dawn thu an sawi a, hei hi khawvel lum zel tih ziaawm nan leh sik leh sa inthlak danglam ven nan a pawimawh dawn tih an sawi bawk. IEA chuan Ningania thuchhuah an siamah hian CO2 pek chhuah a tlem theih nan ram hrang hrangin Paris Agreement-a an thutiam an hlen kawngah chak taka hma an lak a ngaih dawn thu an sawi.