Myanmar-in politics vanga tangte a chhuah dawn

Myanmar ram hruaitu, Aung San Suu Kyi-i chuan sorkar tharin politics vanga tangte chu kar hnih chhunga chhuah zalen an nih theih nan theihtawp a chhuah nghal dawn tih a sawi.

Rorellai, National League for Democracy (NLD) hotu Aung San Suu Kyi-i hi ramdang mi pasala neia fa a neih avang≠in an ram president-ah dah theih a ni lo a, fo≠reign minister atan dah a ni. Suu Kyi-i hi sorkar leh parliament-ah thuneihna sang zawk a neih theih nan special post, state councellor hna a chelh theihna tur bill, NLD in a put luh chu parliament-in a pawm tawh. State councellor hi ramdang prime minister dinhmun nena intluk a ni.

State councellor a nih anga thuchhuah a siam hmasak berah, Suu Kyi-i chuan politics vanga tangte chhuah an nih tur thu hi a sawi. Hei hi jail-a tang lai leh thubuai nei mek mi 500 velin an chhawr thei dawn a ni.

Hun rei tak politics vanga jail-a lo tang tawh, Suu Kyi-i chuan tangte chhuah zalenna tur chu sorkarin a ngaih pawimawh ber zinga mi a nih thu a sawi.

Myanmar sorkar chuan tang chhuah turte hming hi a puangzar tel lo a, an zingah hian zirlai pawh eng emaw zat an tel rin a ni.

Ningani khan Myanmar leh Canada sorkar chuan kawng li-a thawhhona tur inremna an siam. Myanmar khawpui, Naypyitaw-a Myanmar President U Htin Kyaw leh Canada Foreign Minister Stephane Dion-ten meeting an neihah he inremna hi an ziak an ni. Ram pahnihte thawhdunna tur inremna ah hian reconciliation effort, tui thianghlim leh investment te a huam a ni. Kum 1980-a tihtawp tak, Myanmar zirlai hnena Canadian scholarship pek ṭhin pawh chhunzawm a ni ang.

Ni thum chama Myanmar tlawhtu, Dion hian foreign minister Suu Kyi-i bakah Myanmar civil society aiawh hrang hrangte a kawm. Dion hian Myanmar sorkar thar ṭanpui nan health, education leh social sector-a hman turin Canada chuan dollar maktadui 8 a pek tur thu a sawi bawk.